قازاقستاندىقتارعا 8 ميلليون تەڭگەدەن جوعارى كرەديت كەپىلسىز بەرىلمەۋى مۇمكىن
استانا. KAZINFORM - ەلىمىزدە تۇتىنۋشىلىق بانكتىك قارىز جانە تۇتىنۋشىلىق ميكروكرەديت سوماسىنا قويىلاتىن تالاپتارعا وزگەرىستەر ەنگىزىلەدى. اتالعان قاۋلىنىڭ جوباسى «اشىق ن ق ا» پورتالىندا جاريالاندى.
قارجى نارىعىن رەتتەۋ جانە دامىتۋ اگەنتتىگى ەكىنشى دەڭگەيلى بانكتەردىڭ 2200 ا ە ك مولشەرىنە دەيىن بەرە الاتىن كەپىلسىز نەسيە سوماسىن شەكتەۋدى ۇسىنىپ وتىر. 2024-جىلعى ا ە ك (ايلىق ەسەپتىك كورسەتكىش) كولەمى - 3692 تەڭگە. ەگەر جاڭا قاۋلى قابىلدانسا، ازاماتتار كەپىلسىز 8 ميلليون 122,4 مىڭ تەڭگەدەن استام سوماعا نەسيە الۋ مۇمكىندىگىنەن ايىرىلادى.
ال، ميكروقارجى ۇيىمدارى ءۇشىن كەپىلسىز كرەديت بەرۋدىڭ سوماسى ەكى ەسە تومەن، ياعني ميكروقارىز كولەمى 4 ميلليون 61,2 مىڭ تەڭگە بولسا كەپىلسىز بەرمەۋدى جوسپارلاپ وتىر.
سونداي-اق قارجى نارىعىن رەتتەۋ جانە دامىتۋ اگەنتتىگى ازىرلەگەن قۇجاتتا جوبانىڭ الەۋمەتتىك ماڭىزى جوق ەكەندىگى ايتىلعان. ماقسات - نەسيە بەرۋ تاجىريبەسىن بانكتەر مەن ميكروقارجى قىزمەتى تۋرالى قولدانىستاعى زاڭداردىڭ نورمالارىنا سايكەس كەلتىرۋ.
ايتا كەتەيىك، جاڭا نورمالاردىڭ كەپىلدەندىرىلگەن نەسيەلەرگە قاتىسى جوق.
ەسكە سالا كەتەيىك، بيىل 19-ماۋسىمدا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى بارىنشا ازايتۋ، قارىز الۋشىلاردىڭ قۇقىقتارىن قورعاۋ، قارجى نارىعىن رەتتەۋدى جانە اتقارۋشىلىق ءىس جۇرگىزۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.