قازاقستاندىقتار وڭتۇستىك كورەيادا زاڭدى تۇردە جۇمىس ىستەي الادى

استانا. قازاقپارات - ەڭبەك جانە حالىقتى الەۋمەتتىك قورعاۋ ۆيتسە- ءمينيسترى اسقاربەك ەرتايەۆ وڭتۇستىك كورەياعا جۇمىس ساپارى اياسىندا كورەيا رەسپۋبليكاسى جۇمىسپەن قامتۋ جانە ەڭبەك مينيسترلىگىنىڭ وكىلدەرىمەن كەزدەسۋ وتكىزدى، دەپ حابارلايدى BAQ. KZ ۆەدومستۆوعا سىلتەمە جاساپ.

كەلىسسوزدەر بارىسىندا تاراپتار قازاقستاندى وڭتۇستىك كورەياداعى ەڭبەككە رۇقسات بەرۋ جۇيەسىنە - Employment Permit System (بۇدان ءارى - EPS) ەنگىزۋ ماسەلەلەرىن تالقىلادى.

قازاقستان ميگرانتتاردىڭ ەڭبەك جانە الەۋمەتتىك قۇقىقتارىن قورعاۋ ءۇشىن قۇقىقتىق بازانى ودان ءارى جاقسارتۋعا باعىتتالعان ءبىرقاتار كەشەندى شارالار قابىلداۋدا. اتاپ ايتقاندا، الماتى قالاسىندا كورەيا رەسپۋبليكاسىندا جۇمىس ىستەگىسى كەلەتىن قازاقستان رەسپۋبليكاسىنىڭ ازاماتتارىن كاسىپتىك جانە تىلدىك دايارلاۋ بويىنشا كوپسالالى ورتالىق قۇرىلۋدا، - دەدى اسقاربەك ەرتايەۆ.

سونداي- اق ول تەحنيكالىق ماماندىقتار بويىنشا تەستىلەۋ، مەديتسينالىق تەكسەرۋ، بىلىكتىلىكتى ارتتىرۋ بويىنشا وقىتۋعا دايىن ءبىرقاتار الەۋمەتتىك جانە وندىرىستىك وبەكتىلەر انىقتالعانىن حابارلادى.

ق ر ىشكى ىستەر مينيسترلىگىمەن بىرلەسىپ زاڭسىز كوشى-قوننىڭ جولىن كەسۋگە جانە زاڭدى ەڭبەك قىزمەتىن كەڭەيتۋ ءۇشىن جاعداي جاساۋعا باعىتتالعان شارالاردى كۇشەيتۋ ماسەلەلەرى پىسىقتالۋدا، - دەپ تولىقتىردى ۆيتسە- مينيستر.

كەلىسسوزدەر قورىتىندىسى بويىنشا كورەيا رەسپۋبليكاسى جۇمىسپەن قامتۋ جانە ەڭبەك مينيسترلىگىنىڭ وكىلدەرى قازاقستاندى EPS جۇيەسىنە قوسۋ تۋرالى نيەتىن تاعى دا راستادى، بۇل قازاقستان ازاماتتارىنا جاسالعان ەڭبەك شارتتارى اياسىندا وڭتۇستىك كورەيادا زاڭدى تۇردە جۇمىس ىستەۋگە مۇمكىندىك بەرەدى.

كەزدەسۋ سوڭىندا تاراپتار قازاقستان مەن وڭتۇستىك كورەيا اراسىنداعى ەڭبەك كوشى-قونى سالاسىنداعى ىنتىماقتاستىقتى تەرەڭدەتۋدىڭ ماڭىزدىلىعىن اتاپ ءوتتى، بۇل شەتەلدە جۇمىسقا ورنالاسۋعا ۇمتىلاتىن قازاقستاندىق ازاماتتار ءۇشىن جاعدايدى جاقسارتۋعا، سونداي-اق ولاردىڭ كاسىبي دايارلىق دەڭگەيىن ارتتىرۋعا مۇمكىندىك بەرەدى.