قازاقستاندىقتار وڭتۇستىك كورەيادا زاڭدى تۇردە ءۇش جىل جۇمىس ىستەي الادى
استانا. KAZINFORM - وڭتۇستىك كورەيادا زاڭدى جۇمىس ىستىگىسى كەلەتىن وتانداستارىمىزعا ارنالعان جوبا قولعا الىنىپ جاتىر. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتىنىڭ ءتوراعاسى اسقاربەك ەرتايەۆ ءمالىم ەتتى.
«قازاقستان ازاماتتارىنىڭ وڭتۇستىك كورەيادان جۇمىسقا ورنالاستىرۋعا رۇقسات بەرۋ جۇيەسى بويىنشا ءتيىستى شارالار قابىلدانىپ جاتىر. ول ءۇشىن ورتالىق قۇرۋ جۇمىسى باستالدى. ونداعى ماقسات - وڭتۇستىك كورەياعا جۇمىسقا ورنالاسقىسى كەلەتىن ازاماتتارعا ءتىل ۇيرەتۋ. جوبانى ىسكە اسىرۋ اتالعان ەلگە ەڭبەكتەنۋگە بارعان ازاماتتارىمىزدىڭ الەۋمەتتىك جانە ەڭبەك قۇقىعىن قورعاۋعا كەپىل بەرەدى»، - دەدى اسقاربەك ەرتايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي- اق، جوبا اياسىندا وڭتۇستىك كورەياعا بارعان وتانداستارىمىز 3 جىلعا دەيىن زاڭدى تۇردە جۇمىس ىستەي الادى.
ەسكە سالا كەتەيىك، بۇعان دەيىن قازاقستاندىقتاردىڭ وڭتۇستىك كورەيادا زاڭدى تۇردە جۇمىس ىستەۋىنە رۇقسات بەرىلەتىنى تۋرالى حابارلاعان ەدىك.
اۆتور
داۋلەت ىزتىلەۋ