قازاقستاندىقتار وقۋلىقتار مازمۇنىن تالقىلاۋعا قاتىسا الادى

استانا. KAZINFORM - اقپاننىڭ 12 سىنەن باستاپ جاڭادان ازىرلەنگەن وقۋلىقتاردىڭ مازمۇنىنا قوعامدىق تالقىلاۋلار جۇرگىزىلىپ جاتىر، دەپ حابارلايدى ق ر وقۋ-اعارتۋ مينيسترلىگىنىڭ رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعى.

talkylau.ebmso.edu.kz سايتىندا وقۋلىقتار مازمۇنىنىڭ ساپاسى، قۇرىلىمى، ادىستەمەلىك تاسىلدەرى، بايانداۋ ءتىلى مەن بەزەندىرىلۋىنە قاتىستى قوعام مەن عىلىمي- پەداگوگيكالىق قاۋىمداستىق وكىلدەرى سىندارلى پىكىرلەرىن بىلدىرە الادى. وندا جاڭادان ازىرلەنگەن وقۋلىقتار بار:
• 3-سىنىپ ءۇشىن «ەڭبەككە باۋلۋ»، «بەينەلەۋ ونەرى»، «ورىس ءتىلى» (ورىس تىلىندە وقىتاتىن مەكتەپتەر ءۇشىن)، شەت تىلدەرى (اعىلشىن، فرانسۋز)؛
• 3، 9-11-سىنىپتار ءۇشىن «نەمىس ءتىلى»؛
• 5-9-سىنىپتارعا ارنالعان «جاھاندىق قۇزىرەتتىلىك» وقۋلىقتارى قاعاز نۇسقادا؛
• 3-سىنىپقا ارنالعان «سيفرلىق ساۋاتتىلىق/سيفروۆايا گراموتنوست» ءپانى بويىنشا ەلەكتروندى وقۋلىقتار.

قوعامدىق تالقىلاۋعا عىلىمي- پەداگوگيكالىق قوعام وكىلدەرى، ادىسكەرلەر، عالىمدار، سونداي-اق وقۋلىقتاردىڭ ساپاسىنا بەي-جاي قارامايتىن قازاقستاندىقتار قاتىسۋعا مۇمكىندىك الدى. ول ءۇشىن كەلەسى قادامداردى ورىنداۋ قاجەت: ۆەب-پورتالدا تىركەلۋ، وقۋلىقتاردىڭ ءتۇپنۇسقا- ماكەتتەرىمەن تانىسۋ جانە «تۇسىنىكتەمە قوسۋ» تەتىگى ارقىلى وقۋلىقتاردىڭ مازمۇنى مەن قۇرىلىمىنا قاتىستى سىن-پىكىرلەر، ۇسىنىستار مەن ەسكەرتۋلەردى جازا الاسىز.