قازاقستاندىقتار كەلەسى جىلدان باستاپ ەڭبەك شارتىن سيفرلى فورماتتا جاسايدى

استانا. قازاقپارات - ءماجىلىس كۋلۋارىندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ەڭبەك جانە ۇجىمدىق كەلىسىمدەر جاساۋ تۋرالى زاڭ جوباسى سيفرلىق فورماتتا ازىرلەنگەنىن مالىمدەدى.

بۇل قادام ەڭبەك قاتىناستارىن جاريا ەتۋدى كوزدەيدى جانە كاسىپوداقتار ءۇشىن اۆتوماتتاندىرىلعان جۇمىس ورنىن ەنگىزۋ ارقىلى جۇزەگە اسادى.

«بىرىنشىدەن، ەڭبەك جانە ۇجىمدىق كەلىسىمدەردى سيفرلىق فورماتتا جاساۋعا كوشۋ جوسپاردا، كاسىپوداقتار ءۇشىن اۆتوماتتاندىرىلعان جۇمىس ورنى ەنگىزىلەدى. ءتيىستى زاڭ جوباسى ازىرلەندى جانە اعىمداعى جىلى قاراۋعا ەنەدى. ايتا كەتۋ كەرەك، پيلوتتىق رەجيمدە 8,7 مىڭنان استام ەڭبەك كەلىسىمدەرى ەلەكتروندىق فورماتتا جاسالدى»، - دەپ اتاپ ءوتتى ول.

ونىڭ ايتۋىنشا، اقپاراتتىق جۇيەگە جۇمىسشىلاردىڭ قۇقىقتارىن قورعاۋعا كومەكتەسەتىن سەگىز مىڭ ۇجىمدىق كەلىسىم تۋرالى دەرەكتەر ەنگىزىلگەن.

«ەكىنشىدەن، ەلەكتروندى شتاتتىق كەستە جوباسى جۇزەگە اسىرىلۋدا - بۇل ەڭبەك قاتىناستارىن دەكلاراتسيالاۋ فۋنكتسيونالى، اقپاراتتىق جۇيەلەردە بارلىق جۇمىس ورىندارىنىڭ كودتالۋىن ەنگىزۋدى قامتيدى. بۇل قۇرال ەڭبەك رەسۋرستارىن ءدال ەسەپكە الۋعا، جۇمىس ورىندارىن قۇرۋ جانە ەڭبەك جاعدايلارىن قالىپتاستىرۋ، جەكە قورعاۋ قۇرالدارىمەن جانە الەۋمەتتىك كەپىلدىكتەرمەن قامتاماسىز ەتۋدى باقىلاۋعا مۇمكىندىك بەرەدى. ۇشىنشىدەن، پلاتفورمالىق جۇمىسپەن قامتۋدى زاڭنامالىق تۇرعىدان رەتتەۋ ەنگىزىلدى، بۇل وڭايلاتىلعان تىركەۋ پروتسەدۋراسىن قامتيدى. پيلوتتىق جوبا اياسىندا 19 مىڭنان استام تاكسي جۇرگىزۋشىسى قوسىلدى جانە 20 ميلليوننان استام فيسكالدىق چەك بەرىلدى»، - دەپ تولىقتىردى مينيستر.