قازاقستاندىقتار جول-كولىك وقيعاسىن پوليتسياسىز تىركەي الادى

2024 -جىلدىڭ 1-قاڭتارىنان باستاپ ازاماتتار ۇساق جول-كولىك وقيعالارى كەزىندە پوليتسيانىڭ جانە سوتتىڭ قاتىسۋىنسىز جەڭىلدەتىلگەن تارتىپتە ساقتاندىرۋدى رەسىمدەي الادى. بۇل ءۇشىن مەملەكەت «ەۋروحاتتاما» ارنايى ءموبيلدى قوسىمشاسىن ازىرلەدى. Kazinform بۇل تۋرالى Polisia.kz-كە سىلتەمە جاساپ حابارلايدى.

قوسىمشانىڭ كومەگىمەن جۇرگىزۋشىلەر وزدەرى جول-كولىك وقيعالارى فاكتىسىن تىركەپ، ساقتاندىرۋ كومپانيالارىنا ماتەريالدىق زالالدى وتەۋگە ءوتىنىم بەرەدى.

«ەۋروحاتتاما» ارقىلى جول-كولىك وقيعالارىن رەسىمدەۋدىڭ مىندەتتى ءۇش شارتى بار:

1) جول-كولىك وقيعاسىنا ەكى كولىك قۇرالى عانا قاتىسقان كەزدە؛

2) جۇرگىزۋشىلەردىڭ قولدانىستاعى ساقتاندىرۋى بولۋى قاجەت. سونداي-اق كىم كىنالى، ال كىم زارداپ شەگۋشى ەكەنىندە كەلىسپەۋشىلىكتەر بولماعان كەزدە؛

3) اپات سالدارىنان دەنساۋلىققا زالال كەلتىرىلمەسە، ال كولىككە كەلتىرىلگەن شىعىن سوماسى 100 ايلىق ەسەپتىك كورسەتكىشتەن اسپاسا، ول 369 مىڭ تەڭگە.

وسىنداي تارتىپتە جول-كولىك وقيعاسىن رەسىمدەۋ ءۇشىن ءموبيلدى تەلەفونعا «ەۋروحاتتاما» قوسىمشاسىن قوسىپ الىپ، تىركەلۋ ءراسىمىن جۇرگىزىپ، وقيعانىڭ فوتو جانە بەينەماتەريالدارىن سالۋ كەرەك. قوسىمشانى ءتيىمدى پايدالانۋ ماقساتىندا جول- كولىك وقيعاسىنىڭ قاتىسۋشىلارى جاقىن جەردەگى پوليتسيا ناريادىنا جۇگىنە الادى، ولار ونى پايدالانۋ كەزىندە كومەك كورسەتەدى.

«ەۋروحاتتامانىڭ» ارتىقشىلىعى نەدە؟

بىرىنشىدەن. ازاماتتار ۇساق جول-كولىك وقيعالارىن رەسىمدەۋ ءۇشىن پوليتسيانى كۇتپەيدى، وسىلايشا جولدارداعى كەپتەلىس جاعدايلارى تومەندەيدى.

ەكىنشىدەن. جەڭىلدەتىلگەن تارتىپپەن تىركەلگەن جول-كولىك وقيعاسى كەزىندە جۇرگىزۋشىلەر اكىمشىلىك جاۋاپكەرشىلىككە تارتىلمايدى.

ۇشىنشىدەن. ساقتاندىرۋ تولەمدەرىنىڭ مەرزىمى قىسقارادى. ەگەر بۇرىن وسىنىڭ ءبارى 30 دان 90 كۇنگە دەيىن ۋاقىتتى السا، قازىر حاتتاما تىركەۋ ساتىنەن باستاپ تولەمدى الۋعا شامامەن بەس كۇن كەتەدى.

«جۇرگىزۋشىلەردى جول ءجۇرىسى قاعيدالارىن ساقتاۋعا جانە جول-كولىك وقيعالارىن بولدىرماۋعا شاقىرامىز»، - دەدى ق ر ءى ءى م ا پ ك ەرەكشە تاپسىرمالار جونىندەگى اعا ينسپەكتورى قۋانىش تىلەكبايەۆ.