قازاقستاندىقتار جەكە كۋالىكتى قالاي ونلاين الا الادى

استانا. KAZINFORM - قازاقستاندىقتار ەندى جاڭا جەكە كۋالىكتى ونلاين الا الادى.

جەكە كۋالىكتى ەندى تولىقتاي ونلاين راسىمدەۋگە بولادى. eGov.kz پورتالىندا جانە eGov Mobile موبيلدى قوسىمشاسىندا قۇجاتتى قاشىقتان قايتا راسىمدەۋگە مۇمكىندىك بەرەتىن پيلوتتىق جوبا ىسكە قوسىلدى. باستامانى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن ىشكى ىستەر مينيسترلىگى بىرلەسىپ جۇزەگە اسىردى.

- موبيلدى قوسىمشا ارقىلى ءوتىنىم بەرۋ ءۇشىن قوسىمشادا اۆتوريزاتسيادان ءوتۋ، ءتيىستى قىزمەتتى تاڭداپ، بيومەتريالىق سايكەستەندىرۋدەن ءوتۋ، قاجەتتى دەرەكتەردى تولتىرۋ، قۇجاتتى الۋ ورنىن كورسەتۋ، مەملەكەتتىك باج سالىعىن تولەۋ جانە ءوتىنىمدى Face/Touch ID ارقىلى راستاۋ قاجەت. بۇل قىزمەتتى تەك جەكە كۋالىك يەسى عانا الا الادى. باسقا ادامنىڭ اتىنان، ءتىپتى سەنىمحات نەمەسە قامقورشىلىق نەگىزىندە دە ءوتىنىم بەرۋ مۇمكىن ەمەس. جەكە كۋالىكتى ونلاين تۇردە تەك ونىڭ قولدانىلۋ مەرزىمى اياقتالعان جاعدايدا عانا اۋىستىرۋعا بولادى - قۇجات مەرزىمى اياقتالعانعا دەيىن 30 كۇن بۇرىن نەمەسە مەرزىمى وتكەننەن كەيىن 10 كۇن ىشىندە. جاڭا جەكە كۋالىكتى ءوتىنىش بەرۋشى الدىن الا كورسەتكەن تىركەۋ پۋنكتىنەن الۋعا بولادى. قۇجاتتى دايىنداۋدىڭ ستاندارتتى مەرزىمى - 15 جۇمىس كۇنى، - دەلىنگەن eGov.kz حابارلاماسىندا.