قازاقستاندىقتار حالىقارالىق جۇرگىزۋشى كۋالىگىن قايدان جانە قالاي الا الادى

الماتى. KAZINFORM - الماتى قالالىق پوليتسيا دەپارتامەنتى، ازاماتتارعا حالىقارالىق جۇرگىزۋشى كۋالىگىن بەرۋگە قۇقىعى جوق جەكە ۇيىمدارعا، تۋريستىك اگەنتتىكتەرگە جانە باسقا دا قۇرىلىمدارعا جۇگىنۋگە بولمايتىنىن ەسكەرتەدى.

حالىقارالىق جۇرگىزۋشى كۋالىگى - جۇرگىزۋشىنىڭ شەتەلدە كولىك قۇرالىن باسقارۋ قۇقىعىن راستايتىن قۇجات. 1968-جىلى 8-قاراشا كۇنى جول قوزعالىسى تۋرالى ۆەنا كونۆەنتسياسىنا قول قويعان قۇجاتتى 180 نەن استام ەل مويىنداعان.

الماتى قالالىق پوليتسيا دەپارتامەنتىنىڭ اكىمشىلىك پوليتسيا باسقارماسىنىڭ پروتسەسسينگ ورتالىعىنىڭ باستىعى ايدىن مەركىمبايەۆتىڭ تۇسىندىرۋىنشە، قازاقستان رەسپۋبليكاسىنىڭ «ىشكى ىستەر ورگاندارى تۋرالى» زاڭىنىڭ 6-بابىنا سايكەس، جۇرگىزۋشى كۋالىكتەرىن، ونىڭ ىشىندە حالىقارالىق كۋالىكتەردى بەرۋ ىشكى ىستەر ورگاندارىنىڭ ايرىقشا قۇزىرەتىنە جاتادى.

- قازىر ەلدە حالىقارالىق جۇرگىزۋشى كۋالىكتەرى بەرىلمەيدى. ازاماتتاردىڭ كۇماندى ونلاين-سايتتار نەمەسە جەكە فيرمالار ارقىلى كۋالىك راسىمدەۋگە بەرگەن وتىنىشتەرى زاڭدى كۇشكە يە ەمەس. حالىقارالىق جۇرگىزۋشى كۋالىگى ۇلتتىق جۇرگىزۋشى كۋالىگىنىڭ ورنىن باسپايدى، تەك ونىڭ رەسمي اۋدارماسى عانا، - دەپ اتاپ ءوتتى پوليتسيادان.

قۇجات قاجەت بولۋى مۇمكىن:

* شەتەلدە اۆتوكولىكتى جالعا الۋ كەزىندە؛

* جەكە اۆتوكولىكپەن شەكارادان ءوتۋ كەزىندە؛

* جولداعى تەكسەرۋ بارىسىندا قۇجاتتاردى كورسەتۋ كەزىندە؛

* شەتەلدە ساقتاندىرۋ راسىمدەۋ كەزىندە.

حالىقارالىق جۇرگىزۋشى كۋالىگىن الۋ ءۇشىن ەمتيحان تاپسىرۋ نەمەسە وقۋدان ءوتۋ تالاپ ەتىلمەيدى.

الماتى قالالىق پوليتسيا دەپارتامەنتى، ازاماتتاردى ساق بولۋعا جانە الاياق دەلدالداردىڭ ارباۋىنا تۇسپەۋگە شاقىرادى.

كۇمان تۋىنداعان جاعدايدا ازاماتتارعا اۋماقتىق ىشكى ىستەر ورگاندارىنا جۇگىنىپ، تولىق اقپارات الۋعا كەڭەس بەرىلەدى.

بۇعان دەيىن جۇرگىزۋشى كۋالىگىن الاتىندار 073/ە انىقتاماسىن قاعاز تۇرىندە تاپسىرمايتىنى تۋرالى جازعانبىز.