قازاقستاندىقتار العاش رەت الەمدەگى ەڭ قيىن شىڭدى باعىندىردى

استانا. KAZINFORM - قازاقستاندىق الپينيستەر مەن ولاردىڭ ليتۆالىق ارىپتەسى العاش رەت ارگەنتيناداعى Cerro Torre شىڭىنا شىقتى، - دەپ حابارلايدى Tengritravel.kz.

ەكسپەديتسيا قاتىسۋشىسى، قازاقستاندىق دەنيس لۋكيانچۋك رەداكسيانىڭ WhatsApp نومىرىنە حابارلاسىپ، سۋرەتتەر جىبەرىپ، شىڭدى قالاي باعىندىرعانىن ايتىپ بەردى. ولار بيىلعى ماۋسىمدا Cerro Torre شىڭىنا جەتكەن ءۇشىنشى كوماندا اتاندى. كوماندا قۇرامى كەلەسىدەي بولدى: ەكسپەديتسيا جەتەكشىسى ومار اسەربەكوۆ، كوماندا كاپيتانى گريگوري شۋكين، وپەراتور دەنيس لۋكيانچۋك جانە ماريۋس گرۋزاۋسكاس.

كوماندانىڭ تاۋعا شىعۋى بەس كۇنگە جالعاستى. ولار 60 شاقىرىمدىق اسۋلار مەن مۇزدىقتاردى كەسىپ ءوتتى. سونىمەن قاتار الپينيستەر توبى 1700 مەتر بيىكتىككە كوتەرىلىپ، «راگني» مارشرۋتىن باعىندىردى. ساپار بارىسىندا ولار كۇردەلى رەلەفكە تاپ بولدى. ەكسپەديتسيا قاتىسۋشىسىنىڭ ايتۋىنشا، كوپتەگەن تەحنيكالىق ۋچاسكە جوعارى ساناتقا، ياعني 6-ساناتقا جاتقىزىلدى. پاتاگونيادا ولار باسقا شىڭدارعا دا كوتەرىلدى. ولاردىڭ ىشىندە Mojon Rojo, Aguja Poincenot, Aguja Medialuna بار.

دەنيس لۋكيانچۋك كوماندانىڭ باتىلدىعىنا تاڭعالعانىن جاسىرمادى. سونىمەن قاتار ول الپينيستەر تۋرالى فيلم ءتۇسىرۋ جوسپاردا بار ەكەنىن اتاپ ءوتتى.

«ءبىز قازاقستاندا الپينيزمدى ناسيحاتتاۋعا تىرىسامىز. ونىڭ قاۋىپتىلىگى مەن تەكتىلىگى تۋرالى قازاقستاندىقتارعا عانا ەمەس، بۇكىل الەمگە جاريا ەتكىمىز كەلەدى. بۇل جوبا ءبىز ءۇشىن وتە ماڭىزدى جانە ونى بولاشاقتا جالعاستىرۋدى جوسپارلاپ وتىرمىز. ءبىز پاكىستانعا، ا ق ش-قا نەمەسە جاڭا زەلاندياعا جاڭا ەكسپەديتسياعا شىعۋ مۇمكىندىگىن تالقىلاپ جاتىرمىز»، - دەدى قازاقستاندىق.

ايتا كەتەيىك، Cerro Torre - ارگەنتينا مەن چيلي شەكاراسىندا ورنالاسقان وڭتۇستىك پاتاگونياداعى ەڭ تانىمال جانە ادام اياعى جەتۋى قيىن تاۋلاردىڭ ءبىرى. Cerro Torre شىڭىندا قاتتى جەل سالدارىنان مۇزداقتار پايدا بولعان. بۇل شىڭعا جەتۋدى قيىنداتا تۇسەدى.