قازاقستاندىقتار 1- قاڭتاردان باستاپ قانشا موبيلدى اۋدارىم جاساي الادى؟
پرەمەر-ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ قازاقستاندىقتاردىڭ قانداي ۇيالى اۋدارىمدارىنا سالىق سالىناتىنىن ءتۇسىندىردى.
«كەلەسى جىلدان باستاپ موبيلدى اۋدارىمدار ءبىر ادامعا 100 دەن اسپاۋى كەرەك دەيدى. بۇل جۇيە قالاي جۇمىس ىستەيدى؟» - دەپ سۇرادى جۋرناليستەر ءماجىلىس كۋلۋارىندا.
«قازىر بانكتەرمەن اپروباتسيا، پيلوتتىق جوبا ءجۇرىپ جاتىر. ءبىز ءۇش اي ىشىندە ءبىر كارتا بويىنشا 100 اۋدارىم كريتەريىن قويدىق. باقىلايمىز. بۇل كريتەريلەر شارتتى تۇردە. رەتتەي الامىز، مۇمكىن از، مۇمكىن كوپ بولۋى مۇمكىن (اۋدارىمدار سانى - ەسك.)»، - دەپ جاۋاپ بەردى ەرۇلان جاماۋبايەۆ.
ول جاڭا تۇزەتۋلەر كاسىپكەرلىك قىزمەت سيپاتىنا يە موبيلدى اۋدارىمدارعا سالىق سالۋعا باعىتتالعانىن اتاپ ءوتتى.
«ەگەر بۇل تۋىستار اراسىنداعى، مۇمكىن ارىپتەستەر اراسىنداعى قاراپايىم اۋدارىمدار بولسا، ءارتۇرلى جاعدايلار بولادى - تۇسىنىكتى، بۇل كاسىپكەرلىك قىزمەتكە قاتىستى ەمەس، سالىق سالىنبايدى. سوندىقتان مۇندا باستى ماقسات - ءجيى جۇرگىزىلەتىن اۋدارىمداردى فيسكاليزاتسيالاۋ»، - دەپ تولىقتىردى ۆيتسە-پرەمەر.
جۋرناليستەر سىيلىققا اقشا جينايتىن مەكتەپ وقۋشىلارىنىڭ اتا-انالارىنا نەمەسە مىسالى، جاڭا پەردە الۋعا جاسالعان اۋدارىمدار ءۇشىن سالىق تولەۋ كەرەك پە دەپ ناقتىلاپ سۇرادى.
«جوق، مۇنداي جاعدايلاردا سالىق شارالارى قابىلدانبايدى، ويتكەنى بۇل ءبىر رەتتىك تولەمدەر ەكەنىن بىلەمىز. مۇنداي اۋدارىمدار ءۇشىن تاۋەكەل تۋدىرمايدى، ءبىراق بيزنەسى بار ادامدار ءۇشىن تاۋەكەل بولادى: دۇكەن، تاكسي جانە ت. ب. ياعني، بيزنەسپەن تىكەلەي اينالىساتىن ادامدار»، - دەپ جاۋاپ بەردى قارجى مينيسترلىگىنىڭ باسشىسى.
ول كاسىپكەرلىك قىزمەتپەن اينالىساتىن قازاقستاندىقتاردى وسىنداي ماقساتتار ءۇشىن ارنايى شوتتار اشۋعا شاقىردى.
«بۇل ءۇشىن ارنايى كارتانى، ارنايى شوتتى اشىڭىز جانە قالاعانىڭىزشا اۋدارىمدار جاساي الاسىز. كاسىپكەرلىك قىزمەتتىڭ بەلگىلى ءبىر تۇرىنە تىركەلىپ، سالىق تولەڭىز. كولەڭكەدە جۇمىس ىستەپ جاتقان كاسىپورىنداردى وسىعان اكەلىپ جاتىرمىز»، - دەدى جاماۋبايەۆ.
Tengrinews.kz