قازاقستاندىق وتباسىلار ءىشىپ-جەم بيۋجەتىنىڭ 33 پايىزىن ەتكە جۇمسايدى

استانا. قازاقپارات - Finprom.kz ساراپتاما رەسۋرسى قازاقستاندىقتاردىڭ 2024-جىلدىڭ العاشقى ءۇش ايىندا ازىق-تۇلىك پەن الكوگولسىز سۋسىنعا جۇمساعان شىعىنىن ەسەپتەپ، ءبىر جىلدىڭ ىشىندە بۇل كورسەتكىش 21,1 پايىز وسكەنىن جازدى.

«بيىلعى ءبىرىنشى توقساندا ءاربىر ورتاشا ستاتيستيكالىق تۇرعىن ازىق-تۇلىك پەن الكوگولسىز سۋسىنعا 131,3 مىڭ تەڭگە جۇمساعان. بۇل ءبىر جىلعى كورسەتكىشتەن 6,7 پايىزعا ارتىق. سالىستىرىپ ايتساق، بىلتىرعى ءبىرىنشى توقساندا بۇل شىعىننىڭ جان باسىنا شاققانداعى كولەمى 123,1 مىڭ تەڭگە بولعان. ال جىلدىق ءوسىم 21,1 پايىزعا جەتىپ وتىر. بەس جىل بۇرىنعى كەزەڭدى قاراساق، 2019-جىلدىڭ ءبىرىنشى توقسانىندا قازاقستاندىقتار ءىشىپ-جەمگە 72,3 مىڭ تەڭگە جۇمساعان. ياعني قازىرگىدەن 44,9 پايىز از»، - دەپ جازىلعان ساراپتامادا.

وڭىرلەر بويىنشا الساق، ءىشىپ-جەمگە ەڭ كوپ اقشا شىعىندايتىندار الماتى قالاسىندا (181,5 مىڭ تەڭگە)، شىعىس قازاقستان (152,1 مىڭ تەڭگە) جانە ماڭعىستاۋ (146,7 مىڭ تەڭگە) وبلىستارىندا تۇرادى.

ازىق-تۇلىك پەن الكوگولسىز سۋسىنعا ەڭ از اقشا جۇمسايتىن وڭىرلەردىڭ ۇشتىگىنە قىزىلوردا (104,6 مىڭ تەڭگە)، اقتوبە (106,4 مىڭ تەڭگە) جانە تۇركىستان (110,4 مىڭ تەڭگە) وبلىستارى كىرگەن.

«قازاقستاندىقتاردىڭ ازىق-تۇلىك پەن الكوگولسىز سۋسىندارعا جۇمسايتىن اقشالارىنىڭ ۇشتەن ءبىر بولىگى ەت پەن ەت ونىمدەرىنە كەتەدى - 43,3 مىڭ تەڭگە. بۇل ءبىر جىل بۇرىنعى كورسەتكىشتەن 6,4 پايىزعا كوپ. ودان كەيىن كوپ اقشا شىعىندايتىن ونىمدەر - نان جانە جارنا ونىمدەرى (كىسى باسىنا 20,5 مىڭ تەڭگە)، ءسۇت ونىمدەرى (14,5 مىڭ تەڭگە)، جەمىس-جيدەك (11,6 مىڭ تەڭگە) جانە كوكونىس (8,9 مىڭ تەڭگە). ءاربىر قازاقستاندىق ءۇش ايدا قانت پەن كونديتەر ونىمدەرىنە، تاتتىلەرگە ورتا ەسەپپەن 8,7 مىڭ تەڭگە، ماي ونىمدەرىنە 6,7 مىڭ تەڭگە، بالىق پەن تەڭىز ونىمدەرىنە 5,9 مىڭ تەڭگە، الكوگولسىز سۋسىندارعا 5,8 مىڭ تەڭگە، جۇمىرتقاعا 3,3 مىڭ تەڭگە جۇمساعان»، - دەپ جازادى Finprom.kz.