قازاقستاندىق وقۋشىلار وسى وقۋ جىلىندا نەشە كۇن دەمالادى

وقۋ-اعارتۋ مينيسترلىگى ورتا ءبىلىم بەرۋ ۇيىمدارىندا 2023-2024 وقۋ جىلىنىڭ باستالۋ مەرزىمىن، ۇزاقتىعىن جانە كانيكۋل كەزەڭدەرىن بەكىتتى، دەپ حابارلايدى قازاقپارات.

«ورتا ءبىلىم بەرۋ ۇيىمدارىندا 2023-2024 وقۋ جىلى 1- قىركۇيەكتە باستالدى، 25- مامىردا اياقتالادى. ءبىرىنشى توقساندا وقۋ ۋاقىتى 8 اپتا، كۇزگى كانيكۋل 30- قازاننان 5- قاراشانى قوسا العاندا 7 كۇنگە سوزىلادى.

ەكىنشى توقساندا 8 وقۋ اپتاسى، قىسقى كانيكۋل 2023-جىلدىڭ 29- جەلتوقسانىندا باستالادى، 2024-جىلدىڭ 7- قاڭتارىن قوسا العاندا كۇنتىزبەلىك 10 كۇنگە جالعاسادى.

ءۇشىنشى توقسان 10 وقۋ اپتاسىنان تۇرادى. 11 كۇندىك كوكتەمگى كانيكۋل 2024-جىلدىڭ 21- ناۋرىزىندا باستالىپ، 31- ناۋرىزعا (قوسا العاندا) دەيىن جالعاسادى»، - دەپ جازدى مينيسترلىكتەن.

ايتا كەتەيىك، جىل سايىن ءبىرىنشى سىنىپ وقۋشىلارى ءۇشىن ءۇشىنشى توقساندا قوسىمشا دەمالىستار بەرىلەدى، ۇزاقتىعى 7 كۇن - 2024-جىلدىڭ 5- اقپانىنان 11- اقپانعا (قوسا العاندا) دەيىنگى ۋاقىتتى قامتيدى.

ءتورتىنشى توقساننىڭ ۇزاقتىعى 8 وقۋ اپتاسىن قۇرايدى. سونداي-اق 25- مامىردا قورىتىندى شىعارىلىپ، وقۋ جىلى اياقتالادى.