اتالعان فەدەراتسيا باسپا ءسوز قىزمەتى ءمالىم ەتكەندەي، ۇيىمنىڭ پرەزيدەنتى مەن اتقارۋشى كوميتەتى قايتا سايلاندى.
2016-جىلعى برازيليادا وتكەن وليمپيادا ويىندارىنىڭ جەڭىمپازى دميتري بالاندين فەدەراتسيانىڭ ۆيتسە-پرەزيدەنتى قىزمەتىنە تاعايىندالدى.
«ماعان سەنىم ارتقاندارىڭىزعا العىس ايتا وتىرىپ، ەلىمىزدەگى جانە حالىقارالىق ارەناداعى سۋ سپورتى تۇرلەرىنىڭ دامۋىنا ءوز ۇلەسىمدى قوساتىنىم ءۇشىن قۋانىشتىمىن. 2023-جىلى وتكەن ازيا ويىندارىندا ءبىزدىڭ فەدەراتسيا سپورتشىلارىنىڭ 80 پايىزى ويىن تۇعىرىنا كوتەرىلدى. بۇل فەدەراتسيا جۇمىسىنىڭ تيىمدىلىگىن دالەلدەيدى. 2016-جىلى جەڭىپ العان وليمپيادانىڭ التىن مەدالى ماعان ۇلكەن ەڭبەكتىڭ ناتيجەسىندە كەلدى. بۇگىندە مەن ءوزىمنىڭ تاجىريبەم مەن جىگەرىمدى قازاقستانداعى سۋ سپورتى تۇرلەرىن دامىتىپ، قولداۋعا دايىنمىن»، - دەدى قازاقستان رەسپۋبليكاسى سۋ سپورتى تۇرلەرى فەدەراتسياسىنىڭ جاڭا ۆيتسە-پرەزيدەنتى دميتري بالاندين.
ايتا كەتەلىك، بالاندين ريو وليمپياداسىنان بولەك، 2014-جىلى وتكەن ينچحونداعى جازعى ازيا ويىندارىندا ءۇش مارتە جەڭىمپاز اتانعان.
قازىرگى تاڭدا ول سپورتتاعى مانسابىن اياقتاپ، جاۋاپتى قىزمەتكە كىرىستى.
ەستەرىڭىزگە سالا كەتەيىك، وسىعان دەيىن بوكستان 2013-جىلعى الەم چەمپيونى، وليمپيادا ويىندارىنىڭ قاتىسۋشىسى ءبىرجان جاقىپوۆ «شىمكەنت كاسىپقوي بوكس تۇرلەرى كلۋبى» كوممۋنالدىق مەملەكەتتىك مەكەمەسىنىڭ ديرەكتورى لاۋازىمىنا تاعايىندالعانىن جازعان بولاتىنبىز.
اۆتور كۇنسۇلتان وتارباي