قازاقستاندىق تەننيسشى قىتايداعى جارىستىڭ شيرەك فينالىنا جولداما الدى

استانا. KAZINFORM - قازاقستاننىڭ ەكىنشى، الەمنىڭ 32-راكەتكاسى يۋليا پۋتينتسيەۆا نينبو (قىتاي) WTA 500 تۋرنيرىنىڭ شيرەك فينالىنا شىقتى.

قازاقستاندىق تەننيسشى ەكىنشى اينالىمدا دۇنيەجۇزىلىك رەيتينگىدە 121-ورىندا تۇرعان 19 جاستاعى گەرمانيالىق ەللا زايدەلدى سىناپ كوردى.

يۋليا ءبىرىنشى پارتيادا 5:1 ەسەبىمەن العا كەتتى. بۇدان كەيىن زايدەل ەسەپتى قىسقارتقانىمەن، پۋتينتسيەۆا دەگەنىنە جەتتى - 6:4.

ەكىنشى سەتتە دە وسىنداي ەسەپ تىركەلدى - 6:4.

ساعات جارىمنان استام ۋاقىتقا سوزىلعان باسەكە بارىسىندا قازاقستاندىق تەننيسشى 7 ەيسپەن بىرگە 9 برەيك-پوينتتىڭ تورتەۋىن پايدالاندى. زايدەل 1 ەيس، 2 برەيكپەن (5 برەيك-پوينت) شەكتەلدى.

يۋليا پۋتينتسيەۆا جارتىلاي فينالعا شىعۋ ءۇشىن الەمنىڭ 11-راكەتكاسى، رەسەيلىك داريا كاساتكينا نەمەسە رەيتينگىدە 42-ورىنداعى چەحيالىق كاتەرجينا سينياكوۆانىڭ قاي جەڭگەنىمەن تالاسادى.

قازاقستاندىق تەننيسشى قازىرگى كەزدە WTA Live رەيتينگىسىندە 26-ساتىعا كوتەرىلىپ تۇر.

ەسكە سالا كەتەيىك، بۇدان بۇرىن الماتى تۋرنيرىندە الەكساندر شيەۆچەنكونىڭ ميحايل كۋكۋشكيندى ۇتقانىن جازعان بولاتىنبىز.