قازاقستاندىق سپورتشىلاردىڭ وتكەن اپتاداعى جارقىن جەڭىسى

استانا. KAZINFORM - وتكەن اپتا قازاق سپورتشىلارى ءۇشىن جەتىستىككە تولى بولدى. ق ر تۋريزم جانە سپورت مينيسترلىگى سپورتشىلارىمىزدىڭ قانداي كورسەتكىشتەرگە قول جەتكىزگەنىنە قىسقاشا شولۋ جاسادى.

دزيۋدو: پورتۋگاليادا ۇيىمداستىرىلعان دزيۋدودان الەمدىك گران-پري تۋرنيرىندە قازاقستان قۇراماسى ءبىر جۇلدە جەڭىپ الدى. قىزدار اراسىنداعى 48 ك گ سالماق دارەجەسىندە بەلدەسكەن وتانداسىمىز ءابيبا ءابۋجاقىنوۆا تۋرنيردىڭ قولا جۇلدەگەرى اتاندى. ءۇشىنشى ورىن ءۇشىن وتكەن كەزدەسۋدە جەرلەسىمىز تۇركيالىق سيلا ەرسىننەن باسىم ءتۇستى.

ۆەلوسپورت: ۆەلوسپورتتان تۇركيادا وتكەن GP ANTALYA AIRPORT CITY باسەكەسىندە ۇلتتىق قۇرامانىڭ مۇشەسى رۋسلان اليەۆ قولا جۇلدەگە يە بولدى. ونىڭ ۋاقىت كورسەتكىشى - 03:26:05.

ۇستەل تەننيسى: ۇستەل تەننيسىنەن سپورت شەبەرى جانەركە قوشقىمبايەۆا دوحادا وتكەن (قاتار) WTT Youth Contender تۋرنيرىندە توپ جاردى. ول 19 جاسقا دەيىنگى سپورتشىلار اراسىنداعى باسەكەدە تۇعىردىڭ بيىك ساتىسىنا كوتەرىلدى.

ستەند اتۋ: ستەند اتۋدان كايردە (مىسىر) ءوتىپ جاتقان الەم كۋبوگى كەزەڭىنىڭ «تراپ» باعدارلاماسىندا وتانداسىمىز ماريا دميتريەنكو توپ جاردى. التىن جۇلدە ءۇشىن وتكەن تارتىستى سايىستا 35 جاستاعى وتانداسىمىز توكيو وليمپياداسىنىڭ چەمپيونى، 2 دۇركىن الەم چەمپيونى فاتيما گالۆەز جانە توكيو وليمپياداسىنىڭ 2 مارتە جۇلدەگەرى الەسساندرا پەريلليدەن وزدى.

نىسانا كوزدەۋ: مىسىر استاناسىندا نىسانا كوزدەۋدەن ءوتىپ جاتقان رەيتينگتىك الەم كۋبوگىندا جەرلەستەرىمىز ەكى جۇلدەگە يە بولدى. پنەۆماتيكالىق تاپانشادان 10 مەتردەن وق اتۋدا ۆالەري راحيمجان مەن يرينا يۋنۋسمەتوۆا جۇبى قولا جۇلدەگەر اتانسا، ءدال وسى باعدارلامانىڭ جەكەلەي سايىسىندا يرينا يۋنۋسمەتوۆا ءۇشىنشى ورىنعا تابان تىرەگەن بولاتىن. ستەند اتۋ جانە نىسانا كوزدەۋدەن الەم كۋبوگىندا 66 مەملەكەتتەن جينالعان 678 سۇرمەرگەن 10 جۇلدە جيىنتىعىن ساراپقا سالىپ جاتىر. باسەكە 1-اقپانعا دەيىن جالعاسادى.

اۆتور
ابىلايحان جۇماشەۆ