قازاقستاندىق سپورتشى ساۋد ارابياسىندا ۇستالعانى تۋرالى اقپارات تارادى

استانا. KAZINFORM - پاۋەرليفتينگتەن ازيا جانە الەم چەمپيوناتتارىنىڭ جۇلدەگەرى سەرگەي ۆەسەلوۆ ساۋد ارابياسى اۋماعىندا قاماۋعا الىندى دەگەن اقپارات تارادى.

Tengri Sport-قا بەرگەن سۇحباتىندا سپورتشىنىڭ اكەسى ءمان-جايدى ايتتى. ەر ادامنىڭ ايتۋىنشا، ۇلى ىستامبۇلعا دەمالۋعا بارىپ، بايلانىسقا شىقپاي قالعان. سپورتشىنىڭ اكەسى ەۆگەني ۆەسەلوۆ بۇقارالىق اقپارات قۇرالدارىنان اقپارات تاراتۋعا كومەك سۇرادى.

ەۆگەني ۇلى باستاپقىدا ىستامبۇلدا دەمالىپ، سودان كەيىن دۋبايعا بارۋدى جوسپارلاعانىن ايتتى.

«استانادان ىستامبۇلعا ۇشىپ بارا جاتقانىن جەتكىزدى. ونىڭ باعىتى مىناداي بولدى: وسكەمەن - استانا - ىستامبۇل - دۋباي جانە كەرى باعىتتا. قازىر مەن ءۇشىن باستى مىندەت - ۇلىمدى قازاقستانعا، ۇيگە قايتارۋ»، - دەدى ەۆگەني.

سونداي-اق، ەۆگەني ۇلى مەدينادا (ساۋد ارابياسى) تابىلعانىن، ءبىراق ونىمەن جەكە بايلانىسىپ، سويلەسۋ مۇمكىن بولماعانىن ايتتى.

«ۇلىممەن سويلەسكەن جوقپىن. كونسۋل سول جەرگە ەرىكتىلەر جىبەرگەن. ولاردىڭ ءبىر مينۋتتاي عانا ۋاقىتى بولدى. ولار جاي عانا ءحال-جاعدايىن، دەنساۋلىعىن سۇراعان. سەرگەي وتباسىمىزىڭ قۇپيا ءسوزىن راستادى. وتباسىمىزدا بالا كەزىمىزدەن بەرى قۇپيا ءسوزىمىز بار. جاي، كەز كەلگەن جاعدايعا دايىن بولۋ ءۇشىن. ول سول ءسوزدى راستاعان، ياعني، راسىندا دا، مەنىڭ ۇلىم»، - دەدى سەرگەيدىڭ اكەسى.

الايدا ونىڭ نەگە ۇستالعانى بەلگىسىز.

«ۇلىم قايدا ەكەنى تۋرالى رەسمي اقپارات جوق. ءبىر ۋچاسكە دەدى. ال ول نە ءۇشىن ايىپتالىپ وتىر؟ ولار قانداي باپپەن ايىپتاپ وتىر؟ ەشكىم ەشتەڭە ايتپايدى. ءبارى تىپ-تىنىش. نە بولىپ جاتقانى تۇسىنىكسىز»، - دەپ جاۋاپ بەردى ەۆگەني.

ەۆگەني ۆەسەلوۆ سىرتقى ىستەر مينيسترلىگىنە جانە ساۋد ارابياسىنداعى قازاقستاندىق ديپلوماتتارعا ءوتىنىش جولداعان.

«كونسۋلدىق بۇل ماسەلەمەن اينالىسىپ جاتقانىن ايتتى. بەس كۇننەن بەرى استانادامىن، رەسمي جاۋاپ كۇتىپ ءجۇرمىن. ازىرگە ءىستىڭ ەگجەي-تەگجەيى تۋرالى اقپارات كەلگەن جوق»، - دەدى سپورتشىنىڭ اكەسى.