قازاقستاندىق ساياحاتشى شونجىداعى ىستىق بۇلاقتىڭ پايداسى تۋرالى ايتتى

استانا. KAZINFORM - الماتىلىق ولگا وتباسىمەن بىرگە شونجىعا بارىپ، ىستىق بۇلاقتاردا دەمالعان. وتاندىق تۋريزمگە قولداۋ ءبىلدىرىپ جۇرگەن ول شونجىداعى دەمالىسىنا قانشا اقشا جۇمساعانىن، وندا نە ۇناعانىن، وزىمەن بىرگە نە الىپ بارۋ كەرەگىن ايتىپ بەردى، - دەپ حابارلايدى Tengritravel.kz ءتىلشىسى.

ساياحاتشىنىڭ سوزىنشە، قىسقا ۋاقىتقا سوزىلسا دا، دەمالىسىنىڭ كەرەمەت بولعانى سونشالىق، ۇيلەرىنە جەتكەندە بۇكىل وتباسى قايتا شونجىعا ورالعىسى كەلگەن. ول قىستىڭ سوڭعى ايىندا، بارلىعى سۋىقتان شارشاعان كەزدە، وزىڭە دەمالىس جاريالاپ، جىلى سۋدا شومىلۋدىڭ ماڭىزى زور ەكەنىن ايتتى.

«نەلىكتەن شونجىعا بارۋدى شەشتىك دەيسىز عوي؟ ەڭ اۋەلى قىستىڭ سۋىق كۇندەرىندە جىلى سۋدا بولۋعا مۇمكىندىك بەرەدى. سونىمەن قاتار، بۇل - ەمدىك قاسيەتى بار سۋ. ول بۋىنداردى قالپىنا كەلتىرەدى. بۇلاقتا شومىلعاندا دەنەڭ بوساڭسيدى. ياعني، بۇلاقتىڭ 0 پايداسى بار»، - دەدى ولگا.

ىستىق بۇلاقتا تاعى نەمەن اينالىسۋعا بولادى؟

ولگا العاش رەت شونجىعا كەلگەندە ءوزىن ەرەكشە جەڭىل سەزىنگەنىن ايتادى. تازا اۋا، ادەمى تابيعات بىردەن باۋراپ الادى. ونىڭ ۇستىنە كەلە سالا بۋى شىعىپ تۇراتىن جىلى باسسەيندەر دايىن تۇرادى ەكەن. ايتۋىنشا، باسسەيننەن بولەك دەمالىس اۋماعىندا مونشا، كاراوكە جانە ءدامحانا بار.

«دەمالاتىن جەردە مونشا، كاراوكە جانە ءدامحانا بار. ءدامحانانىڭ ءبىر جاقسى تۇسى - مازىردەگى تاعامداردى تاڭداپ، تاپسىرىس بەرسەڭ، قالاعان ۋاقىتىڭا دايىنداپ قويادى. مۇندا نەگىزىنەن لاعمان ءتارىزدى شىعىس تاعامدارى بار. سونىمەن قوسا تاڭعى استىڭ ءتۇر- ءتۇرى، سۋسىندار، شاي، كوفە بارلىعى بار»، - دەدى ول.

اسحاناسى قانداي؟

ساياحاتشى ۇيدەن كەز كەلگەن تاعامدى وزىڭمەن بىرگە الىپ كەلۋگە بولاتىنىن ايتتى. ماسەلەن ەت پەن كوكونىستەردى الىپ كەلىپ، كاۋاپ پىسىرۋگە بولادى. سول جەردە مانگال بەرىلەدى. سونداي-اق كومىر دە ساتىلادى ەكەن.

«وزىمىزبەن بىرگە سۋ مەن كوكونىستەردى اكەلدىك. تابيعات اياسىندا قارنىڭىز ءجيى اشادى. دەگەنمەن كافەدە دە ءبارى ءدامدى بولدى. سونىمەن قوسا كاۋاپتى ءوزىڭىز دايىنداي الاسىز. كومىر مەن مانگالدى دا سول جەردەن الۋعا بولادى»، - دەدى ولگا.

وزىڭىزبەن بىرگە نە الا بارۋ كەرەك؟

ولگا ساپارعا شىققاندا سۇلگىلەر مەن حالاتتاردى الا بارۋ كەرەك ەكەنىن ايتتى.

«وزىڭمەن بىرگە بىرنەشە سۇلگى، حالات الا بارعان ءجون. دەگەنمەن ول جەردە بۇنىڭ بارلىعى ساتىلادى. سونداي-اق وندا كىشىگىرىم ازىق-تۇلىك دۇكەنى دە بار. اسسورتيمەنتى كوپ ەمەس. سول سەبەپتى ەرەكشە بىردەڭە جەگىڭىز كەلسە، وزىڭمەن الا كەلگەن دۇرىس. شاش كەپتىرگىشتى الۋدى ۇمىتپاڭىز»، - دەپ ەسكەرتتى ولگا.

باعالارى قانداي

«بۇل - وتە بيۋدجەتتى دەمالىس بولدى. سەنبى، جەكسەنبى كۇندەرى ءبىر بولمەنى تاۋلىگىنە 12 مىڭ تەڭگەگە جالدادىق»، - دەپ ءتۇسىندىردى ول.

سونىمەن قاتار ساياحاتشى مازىردەگى تاعامداردىڭ باعالارى اسا قىمبات ەمەس ەكەنىن، شامامەن الماتىنىڭ بيۋدجەتتىك كافەلەرىندەگىدەي ەكەنىن ايتتى. مىسالى، سوميان لاعمانىن - 2000 تەڭگەگە، ءبىر شاينەك شايدى 800 تەڭگەگە الۋعا بولاتىنىن اتاپ ءوتتى.

دەمالىس ۇنادى ما

«كوكتايعاقتا شىقساق تا، بارعاندا دا، قايتقاندا دا جىلدام جەتتىك. ءتىپتى قالاي جەتكەنىمىزدى سەزبەي قالدىق. دەمالىسىمىز وتە جاقسى ءوتتى! اتموسفەراسى وتە جاعىمدى، ءارى جايلى ەكەن. بالالى وتباسىلار كوپ بولدى. جۇما كۇنى كەشكە كەلىپ، جەكسەنبىگە دەيىن سوندا بولدىق»، - دەدى ساياحاتشى.