قازاقستاندىق سۋ سالاسى ماماندارىنىڭ ءۇشىنشى لەگى قىتايعا وقۋعا اتتاندى
اقتوبە. KAZINFORM - قىتايعا ەكى اپتالىق كۋرسقا 31 مامان اتتاندى، دەپ حابارلايدى سۋ رەسۋرستارى جانە يرريگاتسيا مينيسترلىگى.
بۇعان دەيىن كورشىلەس ەلدە 30 ادامنان تۇراتىن ەكى توپ ءبىلىم العان بولاتىن. جالپى بيىل قىتايدا قازاقستاندىق سۋ سالاسىنىڭ 121 مامانى بىلىكتىلىگىن ارتتىرادى. وقۋ قىتاي تاراپىنىڭ قاراجاتى ەسەبىنەن ۇيىمداستىرىلدى، وعان قازاقستان رەسپۋبليكاسىنىڭ مەملەكەتتىك بيۋدجەتىنەن قاراجات بولىنبەگەن. قازىرگى ۋاقىتتا سۋ رەسۋرستارى جانە يرريگاتسيا مينيسترلىگى قىتايمەن بىرلەسكەن وقىتۋ باعدارلاماسىن جالعاستىرۋ تۋرالى كەلىسسوزدەر جۇرگىزىپ جاتىر.
- ءساۋىر جانە مامىر ايلارىندا ءبىز قىتايعا 30 ادامنان تۇراتىن ەكى توپ جىبەردىك، ولار وقۋلارىن ءساتتى اياقتادى. ءال ۇشىنشى توپتىڭ قۇرامىندا سۋ سالاسىنىڭ 31 مامانى قىتايعا سۋ رەسۋرستارىن باسقارۋ جانە اعىندى سۋلاردى تازارتۋ تاقىرىبىنداعى كۋرسقا اتتاندى. بۇل وقۋلار پرەزيدەنت جولداۋىندا ايتىلعان، سۋ سالاسىنا بىلىكتى مامانداردى جۇيەلى تۇردە دايىنداۋ قاجەتتىلىگىنە بايلانىستى قولعا الىنعان شارالاردىڭ ءبىرى، - دەدى سۋ رەسۋرستارى جانە يرريگاتسيا ۆيتسە- ءمينيسترى اسلان ابدرايموۆ.
بۇعان دەيىن سۋ رەسۋرستارى مينيسترلىگى 29 گيدروتەحنيكالىق نىسانعا كوپفاكتورلى زەرتتەۋ جۇرگىزىپ جاتقانىن جازعانبىز.