قازاقستاندىق مۇعالىمدەر الەمدە ۇزدىك اتانا الا ما

استانا. KAZINFORM - وقۋ جىلى اياقتالىپ، ءبىلىم سالاسىنىڭ قورىتىندىسى شىعارىلىپ جاتقانى بەلگىلى. بۇل رەتتە، وقۋ- اعارتۋ مينيسترلىگى ءتورت توقسان بويى وقۋشىلاردىڭ ءبىلىمىن ارتتىرۋعا ولشەۋسىز ۇلەس قوسقان مۇعالىمدەردى ىنتالاندىرۋعا نيەتتى.

اتاپ ايتساق، بيىل «قازاقستان مۇعالىمى» ۇلتتىق سىيلىعىنىڭ قورى 20 ميلليون تەڭگەگە دەيىن ارتىپ وتىر.

بۇل بىرەگەي ءىس-شارا مۇعالىمدەردىڭ كورنەكتى جەتىستىكتەرىن اتاپ وتۋگە، شىعارماشىلىق الەۋەتىن ىنتالاندىرۋعا جانە بۇكىل قازاقستان بويىنشا وقىتۋداعى جاڭا قۇزىرەتتەر مەن مۇمكىندىكتەر قالىپتاستىرۋعا ارنالعان.

بەلگىلى بولعانداي، جەڭىمپازعا 10 ميلليون تەڭگە بۇيىرماق. فينالعا وتكەن قاتىسۋشىلار دا ولجاسىز قالمايدى. ولاردىڭ ءارقايسىسىنا 1 ميلليون تەڭگە تابىستالادى. بۇدان بولەك فيناليستەر جۇلدە قورى 1 ميلليون دوللاردى قۇرايتىن «الەم مۇعالىمى» جاھاندىق سىيلىعىنا ۇمىتكەر بولا الادى. سونىمەن قاتار، الەمدىك ءبىلىم بەرۋ قاۋىمداستىعىمەن ءوز ادىستەرى مەن يننوۆاتسيالارىن بولىسۋگە مۇمكىندىك بەرەتىن مەديا تاراپىنان كەڭ قولداۋعا يە بولادى.

«قازاقستان مۇعالىمى» ۇلتتىق سىيلىعىنا باستاۋىش جانە ورتا مەكتەپتىڭ مۇعالىمدەرى قاتىسا الادى. ءوتىنىش بەرۋ 2024 -جىلدىڭ 22 -ساۋىرىنەن 22 -ماۋسىمىنا دەيىن جالعاساتىنىن ەسكە سالعان ءجون.

ۇمىتكەرلەر بارلىق شارتتارمەن https://www.teachers-summit.org سايتىنان تانىسا الادى.

بيىل «قازاقستان ءۇعالىمى» ۇلتتىق سىيلىعىنىڭ باستى ۇيىمداستىرۋشىسى Inclusive Development Foundation كورپوراتيۆتىك قورى بولىپ تابىلادى. وقۋ-اعارتۋ مينيسترلىگى مەن Global Teacher Prize ۇلتتىق سىيلىقتى رەسمي تۇردە قولداپ وتىر.

ايتا كەتەيىك، بۇعان دەيىن قازاقستان مۇعالىمدەرى الەمنىڭ توپ-50 مۇعالىمىنىڭ قاتارىنا ەكى مارتە ەنگەن.

اۆتور

ورالحان قوجانوۆ