قازاقستاندىق ەكس-چەمپيون بوكستان كەتۋ تۋرالى شەشىم قابىلدادى

استانا. KAZINFORM - قازاقستاندىق ەكس-چەمپيون سەرگەي ليپينەتس مانسابىن اياقتايتىنىن مالىمدەدى.

كاسىپقوي بوكستان بۇرىنعى الەم چەمپيونى، قازاقستان وكىلى سەرگەي ليپينەتس (18-5-1، 13 KO) الەۋمەتتىك جەلىدەگى جازباسىندا مانسابىنا قاتىستى پىكىر ءبىلدىردى.

Instagram قولدانۋشىلارىنىڭ ءبىرى «كەلەسى جەكپە-جەك قاشان؟» دەگەن سۇراق قويعان. بۇعان جاۋاپ بەرگەن ليپينەتس:

«مەنىڭشە، كاسىپقوي سپورتتاعى مانسابىمدى اياقتايتىن ۋاقىت كەلدى. مەن كيكبوكسينگتەن (اۋەسقويلار مەن كاسىپقويلار اراسىندا) الەم چەمپيونىمىن. سونداي-اق كاسىپقوي بوكستان دا الەم چەمپيونى اتاندىم»، - دەپ جازدى.

ەسكە سالا كەتەيىك، سەرگەي ليپينەتس سوڭعى جەكپە-جەگىن وتكەن جىلدىڭ قازان ايىندا كاناداداعى مونرەال قالاسىندا، Montreal Casino ارەناسىندا وتكەن بوكس كەشىندە وتكىزگەن. ول بۇل كەزدەسۋدە كانادادا تۇراتىن، تەگى رەسەيلىك ارتۋر بيارسلانوۆكە (20-0، 16 KO) تورەشىلەردىڭ ءبىراۋىزدان قابىلداعان شەشىمىمەن جول بەرگەن.