قازاقستاندىق كاسىپكەرلەرگە ليزينگ الۋ نەسىمەن ءتيىمدى
استانا. KAZINFORM - قارجىلىق ليزينگ بۇگىندە شاعىن جانە ورتا بيزنەستى دامىتۋدا ماڭىزدى ءرول اتقارىپ وتىر. ونىڭ ماڭىزى تۋرالى تولىعىراق قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ايتىپ بەردى.
- كاسىپكەرلەرگە مۇلىكتى ۇزاق مەرزىمگە قوسىمشا كەپىلسىز پايدالانۋ تەتىگى رەتىندە وتە ىڭعايلى قۇرال ۇسىنىلادى، قامتاماسىز ەتۋ قۇرالى. سونىمەن قاتار، بۇل قۇرالدىڭ ماڭىزدىلىعى تولەم كەستەسىنىڭ يكەمدىلىگىمەن، ستاندارتتالعان شارتتارمەن ەرەكشەلەنەدى. اسىرەسە، بانكتىك نەسيەگە قول جەتكىزۋ كەزىندە كەپىل قويۋ باستى تالاپ بولىپ تابىلاتىن جاعدايدا، ليزينگ اسا سۇرانىسقا يە، - دەدى ءمادينا ءابىلقاسىموۆا ەلوردادا ليزينگ تاقىرىبىنا ارنالعان كونفەرەنسيادا.
ونىڭ ايتۋىنشا، ەلىمىزدە قارجىلىق ليزينگتىڭ قۇقىقتىق بازاسى 2000-جىلى قابىلدانعان قارجىلىق ليزينگ تۋرالى زاڭمەن جانە ازاماتتىق كودەكسپەن رەتتەلەدى.
- اتالعان زاڭدار اياسىندا ليزينگ شارتتارىنىڭ نەگىزگى پارامەترلەرى، تاراپتاردىڭ قۇقىقتارى مەن مىندەتتەرى، ليزينگ الۋشىنىڭ قۇقىعى رەتتەلەدى. بۇگىندە ليزينگ الۋشىلار رەتىندە تەك زاڭدى تۇلعالار مەن جەكە كاسىپكەرلەر عانا قاتىسا الادى. كونفەرەنسياعا دايىندىق اياسىندا ءبىز ۇزاق ۋاقىت بويى ليزينگ نارىعىنىڭ قازىرگى دامۋ جاي- كۇيى تۋرالى اقپارات پەن ستاتيستيكانى جينادىق. بۇل سالاعا جاۋاپتى ۋاكىلەتتى ورگان ۇلتتىق ەكونوميكا مينيسترلىگى، سونىمەن قاتار ۇلتتىق ستاتيستيكا بيۋروسى دا ليزينگ نارىعى سۋبەكتىلەرىنىڭ قىزمەتى تۋرالى اقپارات جينايدى. الايدا، قازىر ليزينگ نارىعى تۋرالى، قارجى ۇيىمدارىنا قاتىستى ورتالىقتاندىرىلعان، تولىعىراق جانە تۇراقتى اقپاراتتىڭ جەتكىلىكسىز ەكەنىن كورىپ وتىرمىز. وسىعان بايلانىستى ءبىز ليزينگتىك كومپانيالار مەن ۇلتتىق ستاتيستيكا بيۋروسىنان جيناعان دەرەكتەرگە سۇيەنەمىز، - دەيدى ول.
بۇعان دەيىن حابارلاعانىمىزداي، قازاقستاندا ليزينگ اسسوتسياتسياسى قۇرىلدى.
ايتا كەتەيىك، بۇگىن ەلوردادا «قازليزينگ - 2025: ونەركاسىپ پەن كاسىپكەرلىكتى قارجىلاندىرۋ كوزى رەتىندە قازاقستاندا ليزينگتى دامىتۋ پەرسپەكتيۆالارى» اتتى العاش كونفەرەنسياسى ءوتىپ جاتىر.