قازاقستاندىق جەڭىل اتلەت ەرەجە بۇزىپ جارىستان شەتتەتىلدى

  پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا قازاقستاندىق جەڭىل اتلەت داۆيد ەفرەموۆ 110 مەترگە كەدەرگىلەر ارقىلى جۇگىرۋ سايىسىندا ەرەجە بۇزعانى ءۇشىن (ۋاقىتىنان بۇرىن باستاپ كەتۋ) جارىستان شەتتەتىلدى.

ول بۇگىن 110 مەترگە كەدەرگىلەر ارقىلى جۇگىرۋ سايىسىنان جۇبانىش كەزەڭىندە سىنعا ءتۇسۋى كەرەك بولعان. الايدا، فالستارت (ۋاقىتىنان بۇرىن باستاپ كەتۋ) جاساپ، ديسكۆاليفيكاتسيا الىپ قالدى. وسىلايشا جارتىلاي فينالدىق كەزەڭنەن تىس قالدى.

ايتا كەتەيىك، بۇگىن 7-تامىزعا قاراعان ءتۇنى تاعى ءبىر جەڭىل اتلەتىمىز نورا دجەرۋتو 3000 مەترگە كەدەرگىلەر ارقىلى جۇگىرۋ باسەكەسىنىڭ فينالدىق كەزەڭىندە سىنعا تۇسەدى.

سونىمەن قاتار بوكسشى نازىم قىزايباي جارتىلاي فينالدا قىتايلىق بوكسشىمەن سىنعا تۇسەدى. وسىعان دەيىن ونىڭ قارسىلاسى تۋرالى جازعان بولاتىنبىز.

ەستەرىڭىزگە سالا كەتەيىك، فرانسيا استاناسى پاريج قالاسىندا ءوتىپ جاتقان XXXIII جازعى وليمپيادا ويىندارى 11-تامىزدا مارەسىنە جەتەدى. ويىنعا الەمنىڭ 205 ەلىنەن 10500 سپورتشى قاتىسىپ جاتىر.

وليمپياداشىلار 32 سپورت تۇرىنەن 329 مەدال جيىنتىعىن ساراپقا سالىپ جاتىر.

قازىر قازاقستان قۇراماسىنىڭ قورجىنىندا 1 التىن، 1 كۇمىس، 2 قولا مەدال بار.

اۆتور

كۇنسۇلتان وتارباي