قازاقستاندىق جاس شاحماتشىلار ەلگە تاريحي جەڭىس سىيلادى
استانا. KAZINFORM - تۋريزم جانە سپورت ءمينيسترى ەربول مىرزابوسىنوۆ 11-15-ماۋسىم كۇندەرى لوندوندا حالىقارالىق شاحمات فەدەراتسياسى (ف ي د ە) اياسىندا وتكەن بليتس شاحماتتان كوماندالىق الەم چەمپيوناتىندا كۇمىس جۇلدەگە يە بولعان قازاقستان ۇلتتىق قۇراماسىنىڭ مۇشەلەرىمەن كەزدەستى.
جىلدام جانە بليتس شاحماتتان ۇيىمداستىرىلعان كوماندالىق الەم چەمپيوناتىنا الەمنىڭ تۇكپىر-تۇكپىرىنەن 52 كوماندا قاتىستى. قازاقستان قۇراماسى ءدۇبىرلى دودادا ۇزدىك ناتيجە كورسەتىپ، كوماندالىق ەسەپتە كۇمىس جۇلدەنى يەلەندى. سونىمەن قاتار جەكەلەي سىندا 6 جۇلدە، ونىڭ ىشىندە 2 التىن مەدال جەڭىپ الدى.
كەزدەسۋ بارىسىندا مينيستر قازاقستان كومانداسىنىڭ جەتىستىگىن تاريحي وقيعا دەپ اتاپ، وتاندىق شاحمات مەكتەبىنىڭ جوعارى دەڭگەيدە دامىپ كەلە جاتقانىنىڭ ايقىن كورسەتكىشى ەكەنىن ايتتى.
«مەملەكەت باسشىسى بۇقارالىق سپورتتى دامىتۋ ماسەلەسىن ۇنەمى باستى نازاردا ۇستاپ كەلەدى. سىزدەردىڭ بۇل جەڭىستەرىڭىز - جەكە جەتىستىك ەمەس، بۇكىل قازاقستان حالقى ءۇشىن زور ماقتانىش. سىزدەر ەلىمىزدى الەمنىڭ ۇزدىك شاحمات ۇجىمدارىمەن تەرەزەسى تەڭ ەكەنىن دالەلدەدىڭىزدەر»، - دەدى ەربول مىرزابوسىنوۆ.
حالىقارالىق ارەنادا ەل نامىسىن ابىرويمەن قورعاپ، جوعارى ناتيجە كورسەتكەنى ءۇشىن الديار اڭسات، ەلناز قالياحمەت جانە يسلام ايتەنگە ءمينيستردىڭ العىس حاتى تابىستالدى. سونداي-اق ىشكى ەرەجەگە سايكەس، ۇزدىك ناتيجە كورسەتكەن سپورتشىلاردى ىنتالاندىرۋ ماقساتىندا ءارقايسىسىنا اقشالاي سەرتيفيكاتتار بەرىلدى.
شاحمات سپورتىن دامىتۋعا قوسقان ۇلەسى ءۇشىن قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ «قۇرمەتتى سپورت قىزمەتكەرى» توسبەلگىسىمەن ماراپاتتالدى.
«كەز كەلگەن جەتىستىك - بۇل جاي عانا سپورتتىق ناتيجە نەمەسە جەكە جەڭىس ەمەس، مەملەكەتتىڭ جۇيەلى قولداۋىنىڭ ناقتى كورىنىسى ەكەنىن جاقسى تۇسىنەمىز. ءبىز بۇل قولداۋدى ءار كەزەڭدە سەزىنىپ كەلەمىز: بالالار شاحماتىن دامىتۋدان باستاپ، ەلىمىزدە ءىرى حالىقارالىق تۋرنيرلەردى ۇيىمداستىرۋعا دەيىن. بۇل بىزگە ەرەكشە سەرپىن بەرەدى، جىگەرلەندىرەدى ءارى الداعى بيىك ماقساتتاردى ايقىنداۋعا جول اشادى»، - دەدى تيمۋر تۋرلوۆ.
2025-جىلدىڭ العاشقى جارتىجىلدىعىندا وتاندىق شاحماتشىلار حالىقارالىق دەڭگەيدەگى جارىستاردا 81 مەدال جەڭىپ الدى. ونىڭ ىشىندە 34 ءى - التىن، 21 ءى - كۇمىس، 26 سى - قولا. بۇل - ەلىمىزدە شاحمات سپورتىن دامىتۋ ءىسى جۇيەلى جۇرگىزىلىپ جاتقانىن جانە ەلىمىزدىڭ باسەكەگە قابىلەتتىلىگىنىڭ ارتىپ كەلە جاتقانىنىڭ ايقىن كورىنىسى.