قازاقستاندىق جاس دويبىشى ابسوليۋتتى الەم چەمپيونى اتاندى
استانا. KAZINFORM - تۇركيانىڭ الانيا قالاسىندا جاسوسپىرىمدەر اراسىندا جاس ەرەكشەلىك توپتارى بويىنشا 64 شارشىداعى دويبىدان الەم چەمپيوناتى ءوز مارەسىنە جەتتى.
قازاقستان دويبى فەدەراتسياسىنان ءمالىم ەتكەنىندەي، بۇعان دەيىن بليتس پەن راپيدتەن الدىنا جان سالماعان ب ق و وكىلى التىناي ساماتوۆا سوڭعى كلاسسيكالىق باعدارلامادا ءوزىنىڭ ءۇشىنشى التىنىن جەڭىپ الىپ، 11 جاسقا دەيىنگى ساناتتا ابسوليۋتتى الەم چەمپيونى اتاندى.
سونداي-اق كلاسسيكادان ستۋدەنتتەر اراسىندا تاعى ءبىر باتىس قازاقستاندىق انەل داۋلەتوۆا كۇمىس جۇلدەنى جەڭىپ الدى.
جاسوسپىرىمدەرمەن قاتار ارداگەرلەر اراسىندا 64 شارشىداعى دويبىدان الەم چەمپيوناتى دا ءوتتى. 50 جاستان اسقان ارداگەرلەر اراسىندا تۇركىستان وبلىسىنىڭ وكىلى باۋىرجان بەردىبايەۆ كلاسسيكا بويىنشا قولا مەدالعا يە بولدى.
ايەلدەر اراسىندا كلاسسيكادان 50 جاستان اسقاندار اراسىنان قاراعاندىلىق مانارا ابەۋبەكوۆا ەكىنشى ورىننان كورىندى.
ەسكە سالا كەتەيىك، بۇدان بۇرىن قازاقستاندىق دويبىشىنىڭ جەتىنشى رەت الەم چەمپيونى اتانعانىن جازعان ەدىك.
بۇدان ەكى جىل بۇرىن دا التىناي ساماتوۆا 9 جاسقا دەيىنگىلەر اراسىندا ابسوليۋتتى جەڭىمپاز اتانعان بولاتىن.