قازاقستاندىق جاس ءوسپىرىم تەننيسشىلەر الەم چەمپيوناتىن جەڭىسپەن باستادى

يسپانيانىڭ كوردوۆا قالاسىندا 16 جاسقا دەيىنگى جاس وسپىرىمدەر اراسىندا ءوتىپ جاتقان Davis Cup Juniors Finals تۋرنيرىندە قازاقستان قۇراماسى العاشقى جەڭىسىنە قول جەتكىزدى.

كوماندالىق الەم چەمپيوناتىندا سەرگەي كۆاكتىڭ شاكىرتتەرى وڭتۇستىك كورەيا كومانداسىمەن شەبەرلىك بايقاستى.

وڭتۇستىك كورەيالىقتار ءبىر كۇن بۇرىن جاس وسپىرىمدەر دەۆيس كۋبوگىنىڭ التى دۇركىن جەڭىمپازى يسپانيانى ۇتقان بولاتىن. ونىڭ ۇستىنە قازاقستاندىقتار شىمكەنت قالاسىندا وتكەن الەم چەمپيوناتىنا ىرىكتەۋ كەزەڭىنىڭ جارتىلاي فينالىندا وسى وڭتۇستىك كورەيالىقتارعا ەسە جىبەرگەن ەدى.

ءبىرىنشى بولىپ زاڭعار نۇرلان ۇلى (331 ITF Juniors ranking) كيم مۋ بينمەن (285 ITF Juniors ranking) كورتقا شىقتى. ءۇش ساعاتقا جۋىق ۋاقىتقا سوزىلعان تارتىستى باسەكە كيم مۋدىڭ پايداسىنا اياقتالدى - 6:4، 4:6، 6:7 (3:7).

ەكىنشى ويىندا ءامىر ومارحانوۆ (99 ITF Juniors ranking) جاس وسپىرىمدەر اراسىندا الەمنىڭ 68-راكەتكاسى حۆان دون حەندى ايقىن جەڭدى - 6:2، 6:2.

شەشۋشى، جۇپتىق سىندا دامير جالعاسباي مەن ءامىر ومارحانوۆ 46 مينۋتتا كيم مۋ بين - چون ەن سۋدان ايلالارىن اسىردى - 6:3، 6:2.

وسىلايشا، D توبىندا ءار كوماندانىڭ قورجىنىندا 3 ۇپايدان بار. سەيسەنبى كۇنى يسپانيا يتاليادان باسىم ءتۇستى.

بۇگىن قازاقستان قۇراماسى يسپانيامەن وينايدى.

قازاقستان جاستار قۇراماسىنىڭ دەمەۋشىلەرى - «سامۇرىق-قازىنا» ءۇ ا ق» اكسيونەرلىك قوعامى جانە Sport Qory سپورتتى قولداۋ قورى.