قازاقستاندىق ج ي ەندى ۆيدەونى 5 تىلگە اۋدارىپ، ۇلتتىق ناقىشتا سۋرەت سالادى

استانا. KAZINFORM - قازاقستاندىق عالىمدار بەس ءتۇرلى جاساندى ينتەللەكت ازىرلەدى. ولار دىبىستى بەس تىلدە ماتىنگە اينالدىرىپ، ۆيدەودان ىلەسپە اۋدارما جاسايدى، قازاقشا لاتىن قارپىن ءتۇسىنىپ، ۇلتتىق ناقىشتا سۋرەت سالادى. ەڭ باستىسى، بۇل جۇيەلەر ينتەرنەتسىز دە جۇمىس ىستەي الادى.

Nazarbayev University جانىنداعى اقىلدى جۇيەلەر مەن جاساندى ينتەللەكت ينستيتۋتىنىڭ (ISSAI) ماماندارى كوپشىلىككە جاساندى ينتەللەكتىگە قۇرىلعان بەس جاڭا تەحنولوگيانى تانىستىردى. بۇل جۇيەلەر ج ي- ءدى قازاق ءتىلى مەن مادەنيەتىنە بەيىمدەپ دامىتۋدىڭ ناقتى قادامىنا اينالۋى مۇمكىن.

بەس جۇيەنىڭ تورتەۋى ءقازىردىڭ وزىندە ISSAI پلاتفورماسىندا جۇمىس ىستەپ تۇر. بەسىنشىسى جىل سوڭىنا دەيىن ىسكە قوسىلادى دەپ جوسپارلانعان. جاساندى ينتەللەكت قىزمەتىن پايدالانۋ ءۇشىن ISSAI- ءدىڭ رەسمي سايتىنا تىركەلۋ قاجەت. سول جەردەگى مازىردەن ءار قۇرالدىڭ اتىن تاۋىپ، ەركىن قولدانۋعا بولادى. جۇيە ءار اككاۋنتقا العاشقىدا تەگىن قىزمەت كورسەتەدى. باسقاشا ايتساق، تاپسىرما كولەمى بويىنشا بەلگىلى ءبىر شەكتى ليميت بار. بۇل ليميت قاراپايىم قولدانۋشىعا شامامەن التى ايعا جەتەدى. شەكتى مەجەدەن اسقان سوڭ قىزمەت اقىلى فورماتقا كوشەدى.

Oylan 2.5 - قازاقشا سويلەيتىن كومەكشى

Oylan 2.5 - قازاق، ورىس جانە اعىلشىن تىلىندە جۇمىس ىستەيتىن جاساندى ينتەللەكت كومەكشىسى. پايدالانۋشى وعان سۇراقتى داۋىستاپ ايتا الادى نەمەسە ماتىنمەن جازادى، ءتىپتى سۋرەت تە جۇكتەي الادى. ول ءۇي تاپسىرماسى بولسىن، سىزبا بولسىن - ءبارىن تالداپ، ناقتى جاۋاپ بەرەدى. ەڭ باستى جاڭالىعى - Oylan قازاق ءتىلىن لاتىن الىپبيىمەن دە تۇسىنەدى.

- ءبىز قولدانۋشىلاردىڭ ءاربىر ۇسىنىس-تىلەگىن ساراپتاپ وتىرامىز. ءوزىمىز دە تالداۋ جۇرگىزىپ كوردىك. جاساندى ينتەللەكتىمەن جۇمىس كوپ ىستەيتىن جاستار قازاق تىلىندەگى ءماتىننىڭ ءوزىن لاتىن ارپىمەن ءجيى تەرەتىنىن، ونى ەسەپ ماشيناسى دا تەز وقيتىنىن انىقتادىق. سول ءۇشىن لاتىن ءالىپبيىنىڭ قازاقشا نۇسقاسى ءالى رەسمي بەكىتىلمەسە دە، حالىقارالىق ستاندارت نەگىزىندە جاساق شىعاردىق، - دەيدى ISSAI- دىڭ اتقارۋشى ديرەكتورى ەربول ءابسالياموۆ.

MangiSoz 2.0

بۇل جۇيە قازاق، ورىس، اعىلشىن، تۇرىك جانە قىتاي تىلىندەگى دىبىستاردى ماتىنگە اينالدىرىپ، ءبىر-بىرىنەن دىبىس تۇرىندە دە اۋدارا الادى. اۋدارما دىبىسىنا ەر ادامنىڭ نەمەسە ايەل ادامنىڭ داۋىسىن تاڭداپ الۋعا بولادى.

TilSync - ۆيدەوعا ىلەسپە اۋدارما

بۇل قۇرال بەينەكونفەرەنسيالار مەن ونلاين ساباقتارعا ىڭعايلى. سويلەۋشىنىڭ سوزىنە قازاق، ورىس جانە اعىلشىن تىلدەرىندە سۋبتيتر تۇرىندە ىلەسپە اۋدارما جاسايدى. تانىستىرىلىم كەزىندە ISSAI باس ديرەكتورى حۋسەين اتاكان ۆارولدىڭ كىرىسپە ءسوزىن وسى جۇيە قازاقشاعا سۋبتيتر كۇيىندە اۋدارىپ تۇردى. اۆتورلار ونى ءالى دە جەتىلدىرۋ كەرەك دەپ وتىر. ابدەن جەتىلگەن نۇسقاسىن كۇزگە دەيىن اياقتاپ، جىل اياعىندا رەسمي ىسكە قوسپاقشى.

Beynele - ۇلتتىق ناقىشتاعى سۋرەت

ج ي بۇل جۇيەدە ءماتىندى وقىپ، ونىڭ مازمۇنىن ۇلتتىق ناقىشتا بەينەلەيتىندەي ەرەكشەلىكتەردى دە قولدانىپ سۋرەتكە اينالدىرادى.

Mangitas 02 - قاۋىپسىز سەرۆەر

جاساندى ينتەللەكتپەن جۇمىس ىستەگەندە دەرەكتەردىڭ قاۋىپسىزدىگى ماڭىزدى. Mangitas 02 قۇرىلعىسى جاساندى ينتەللەكت جۇيەلەرىن ينتەرنەتكە قوسپاي-اق، جەرگىلىكتى سەرۆەردە جۇرگىزۋگە مۇمكىندىك بەرەدى. مەكتەپتەر، مەملەكەتتىك مەكەمەلەر مەن جەكە ۇيىمدار دەرەكتىڭ قاۋىپسىزدىگىنە الاڭداسا، سەرۆەردى كوممەرتسيالىق نەگىزدە پايدالانا الادى.

- ءتىپتى ينتەرنەت پايدالانۋ اياسى بارىنشا شەكتەۋلى مەملەكەتتىك ورگانداردىڭ ءوزى بۇل سەرۆەردە جاساندى ينتەللەكت يگىلىكتەرىن الاڭسىز پايدالانا الادى. ارنايى سەرۆەر ۇسىنعاندىقتان، اقپاراتتىڭ تارالماۋىنا تولىق كەپىلدىك بەرە الامىز. مەكەمە قىزمەتكەرلەرىنىڭ ءوزى ەلەكتروندى تاسىعىشقا كوشىرىپ، باسقا جەردە ينتەرنەتكە جۇكتەمەسە، ءبىزدىڭ سەرۆەردەن تارالۋى مۇمكىن ەمەس، - دەيدى ISSAI IT ونىمدەر مەنەدجەرى ءامينا بايكەنوۆا.

ISSAI باس ديرەكتورى حۋسەين اتاكان ۆارول اتالعان جۇيەلەر ەشبىر شەتەلدىك سەرۆيسكە تاۋەلدى ەمەس ەكەنىن باسا ايتتى.

- بۇل - قازاقستاندى تسيفرلىق ەگەمەندىككە جەتەلەيتىن ماڭىزدى قادام. وسى بەس جوبانىڭ ءبارىن ءوز زەرتتەۋشىلەرىمىز، ينجەنەرلەر مەن Data ماماندار جاسادى. قوندىرعىلاردى عانا سىرتتان ساتىپ الدىق. سانكسيا ساياساتى ۋشىعىپ تۇرعان كەزدە العاشقى بۋىننىڭ سۋپەركومپيۋتەرلەرىمەن قۋاتى شامالاس سەرۆەر ورناتۋ وڭاي بولعان جوق. سوندىقتان مۇنى قازاقستان عىلىمىنىڭ جەتىستىگى رەتىندە باعالاۋعا ابدەن بولادى، - دەيدى حۋسەين اتاكان ۆارول.

ينستيتۋتتىڭ اتقارۋشى ديرەكتورى ەربول ءابسالياموۆ 5 جۇيەنى ازىرلەۋگە نازاربايەۆ قورىنىڭ قاراجاتى جۇمسالعانىن، بيۋجەتتەن ءبىر دە ءبىر تەڭگە الىنباعانىن ايتادى. بىلتىردان بەرى ينستيتۋت جەكە مەنشىك ۇيىم رەتىندە قايتا تىركەلگەن ەكەن. بۇل ستاتۋس ولارعا وسى جوبالاردى جەتىلدىرە ءتۇسۋ ءۇشىن عىلىمي گرانتتاردىڭ كونكۋرسىنا قاتىسۋعا مۇمكىندىك بەرەدى.

اقىلى قىزمەتتىڭ قۇنى قانشا؟

ستارتاپشى، زەرتتەۋشى اسەم تاجيەۆا بۇل 5 جۇيەنى قازاقستان عىلىمىنىڭ ۇلكەن سەرپىلىسى دەپ اتادى.

- مەن ب ا ق وكىلدەرى وتىرعانىن ءبىلىپ ارنايى ءسوز الىپ وتىرمىن. بۇگىن تانىستىرىلعان جۇيەلەر جاي عانا عىلىمي جەتىستىك ەمەس ۇلكەن سەرپىلىس ەكەنىن ستارتاپ سالاسىنداعى مامان رەتىندە ايتىپ وتىرمىن. جاساندى ينتەللەكتىڭ قازاق تىلىندە سويلەۋى جانە قاۋىپسىز، جەرگىلىكتى كونتەكستە جۇمىس ىستەي الۋى وتە ىشكى الەۋەتىمىزدى دامىتۋعا اسا قاجەت. جاساندى ينتەللەكتپەن بايلانىستى ستارتاپتاردىڭ ءبارىن ىسكە اسىرۋ ءۇشىن وسى سالاداعى جەتەكشى ەلدەرگە اقشا تولەيمىز. سول اقشانى وزىمىزدە قالدىرۋدىڭ بىردەن-ءبىر جولى - بۇگىن تانىستىرىلعان جۇيەلەر مەن سەرۆەر، - دەيدى ول.

ءامينا بايكەنوۆانىڭ ايتۋىنشا ءار جۇيەنىڭ تەگىن پادالانۋ ءليميتتى ءارتۇرلى:

MangiSoz 2.0 جۇيەسى - ءار اككاۋنتقا العاشقى 250 مىڭ سيمۆولدى دىبىستان ماتىنگە تەگىن اينالدىرىپ بەرەدى. (بۇل 12 شريفتىلى 500-600 بەت ءماتىن اۋدارعا جەتەدى).

Oylan 2.5 - 250 مىڭ توكين تەگىن بەرىلەدى. (بۇل كۇنىنە ءبىر تاپسىرما بەرىلدى دەپ ەسەپتەگەندە 6 ايعا جەتەتىن ليميت).

اقىلى كەزەڭدە 1 ميلليون توكينگە 4 مىڭ تەڭگەدەن اقى الىنادى. وسىنىڭ ءبارىن قولدانۋشىعا ىڭعايلى ەتۋ ءۇشىن جۇيەلەر ابدەن جەتىلدىرىلگەننەن كەيىن موبيلدى قوسىمشالارىن جاساۋ جوسپارلانعان.

جيىن سوڭىندا ەربول ءابسالياموۆ قازاقستاندىقتاردى اتالعان جۇيەلەردىڭ اقىسىز نۇسقاسىن مەيلىنشە جيى تۇتىنىپ، سىن-ەسكەرتپەلەردى تۇسىنىكتى ەتىپ جولداۋعا شاقىردى.

- الەمدەگى جاساندى ينتەللەكتىڭ ءبارى تۇتىنۋشىنىڭ كەرى بايلانىسىنىڭ ارقاسىندا جەتىلىپ جاتىر. سوندىقتان قازاق ءتىلدى ج ي ساپالى بولسىن دەگەن نيەتى بار ءاربىر ازامات وسى ىسكە بەلسەندى اتسالىسسا ەكەن، - دەپ تۇيىندەدى ول.

ايتا كەتەيىك، قوسشىدا تەرگەۋ جۇمىستارىنا جاساندى ينتەللەكت تارتىلىپ جاتىر.