قازاقستاندىق اۋە كومپانياسى دۇلەي داۋىل كەزىندە ۇشاقتى ءساتتى قوندىردى

لوندونداعى «حەنك» دۇلەي داۋىلى كەزىندە قازاقستاندىق اۋە كومپانياسى ۇشاعىن ءساتتى قوندىرىپ، بريتانيالىقتاردى تاڭ قالدىردى. بىرنەشە كۇننەن بەرى انگليا مەن ۋەلستە كوتەرىلگەن قاتتى جەل مەن نوسەر جاۋىن تۇرعىنداردى جارىقسىز قالدىرىپ، سۋ تاسقىنى كولىك قاتىناسىن ۇزگەنى بەلگىلى، دەپ حابارلايدى Kazinform ءتىلشىسى.

لوندوننىڭ حيتروۋ اۋەجايىنان تۇسىرىلگەن كورىنىستە وتاندىق اۋە كومپانياسىنىڭ ۇشاعى اسپاندا تەربەلىپ بارىپ، جەرگە قونىپ جاتىر. وقيعا كۋاگەرلەرى پيلوتتىڭ شەبەرلىگىنە تاڭدانىسىن جاسىرمادى.

بۇل سوڭعى ءۇش ايدا تىركەلگەن سەگىزىنشى تابيعي اپات. وعان «حەنك» دەگەن اتاۋ بەرىلدى. جەلدىڭ جىلدامدىعى ساعاتىنا 130 شاقىرىمعا دەيىن جەتىپ، حالىقتى ابىگەرگە سالدى. شاتىرلاردى قۇلاتىپ، اعاشتاردى ءتۇپ تامىرىمەن جۇلىپ اكەتتى. جەڭىل كولىك جانە تەمىرجول قاتىناسى توقتادى. سۋ تاسقىنى تۋرالى 250 دەي ەسكەرتۋ جاسالدى، مىڭداعان ابونەنت جارىقسىز وتىر. تۇرعىن ۇيلەر سۋدىڭ استىندا قالىپ، حالىقتىڭ ومىرىنە قاۋىپ ءتوندى.

«سۋعا باتىپ، قايتا شىققان كولىكتى الىستان بايقاپ قالدىم. كەيىن ونىڭ اعىنمەن جىلجىپ، كوپىردىڭ استىنا تىرەلگەنىن كوردىم. كولىك جۇرگىزۋشىسى ايەل كىسىنىڭ جان داۋىسى شىقتى. ىشىندە 3 جاسار قىزى بار ەكەن. ويلانباستان قۇتقارۋعا كىرىسىپ، ەكەۋىن دە سىرتقا امان-ەسەن شىعاردىم»، - دەيدى وقيعا كۋاگەرى، بيرمينگەم قالاسىنىڭ تۇرعىنى ليام ستيچ.

تابيعي اپاتتىڭ قۇربانى بولعان جانە جاراقاتتانعاندار بار. اۋا رايىن بولجاۋشىلار جاعدايدىڭ ءالى دە قاۋىپتى ەكەنىن ەسكە سالادى. عالىمدار مۇنداي قۇبىلىستاردىڭ ءجيى تىركەلۋىن جەردىڭ بەتىندەگى ورتاشا تەمپەراتۋرانىڭ ارتۋىمەن بايلانىستىرىپ وتىر.

«2023 - تاريحتاعى ەڭ جىلى جىلداردىڭ ءبىرى بولدى. اۋا تەمپەراتۋراسى رەكوردتىق كورسەتكىشكە جەتتى. داۋىلداردىڭ كوبەيۋىنە جاھاندىق جىلىنۋ سەبەپشى»، - دەيدى ۇلى بريتانيا مەتەورولوگيالىق قىزمەتىنىڭ اعا عىلىمي قىزمەتكەرى مايك كەندون.

مامانداردىڭ پىكىرىنشە، اتموسفەراداعى كومىرقىشقىل گازىنىڭ دەڭگەيى ارتىپ جاتىر. ولار 2024 -جىل ءتىپتى ىستىق بولادى دەپ بولجايدى. ونەركاسىپتىك ءداۋىر باستالعالى دۇنيەجۇزى بويىنشا اۋا تەمپەراتۋراسى سەلسي بويىنشا شامامەن 1,1 گرادۋسقا كوتەرىلگەن. ەگەر ءاربىر ەلدىڭ ۇكىمەتى كليماتتىق وزگەرىستەرگە ەرەكشە نازار اۋدارماسا، جاعداي ۋشىعا بەرمەك.