قازاقستاندىق دەلەگاتسيا ىستانبۇلدا ەتنوسپورت مادەني فەستيۆالىنە قاتىسۋدا
استانا. KAZINFORM - تۇركيانىڭ ىستامبۇل قالاسىندا ءوتىپ جاتقان VI ەتنوسپورت مادەني فەستيۆالىنە قازاقستاندىق دەلەگاتسيا قاتىسىپ جاتىر.
ءتورت كۇنگە جالعاساتىن فەستيۆالدە ق ر اۋدارىسپاق جانە تەڭگە ءىلۋ فەدەراتسياسىنىڭ سپورتشىلارى ونەر كورسەتۋدە.
ەتنوسپورت مادەني فەستيۆالىنە بيىل 20 دان استام ەلدەن 1000 نان استام سپورتشى مەن مادەنيەت سالاسىنىڭ وكىلدەرى قاتىسىپ جاتىر. ونىڭ اياسىندا ءداستۇرلى سپورت تۇرلەرى بويىنشا سايىستار، ۇلتتىق سالت- داستۇرلەر، قولونەر بۇيىمدارى مەن ۇلتتىق تاعامدار كورمەسى ءوتىپ، ءداستۇرلى مۋزىكا جانە ءداستۇرلى بالالار ويىندارى وينالدى. سونداي-اق، قوناقتار كۇزدە استانادا وتەتىن 5- دۇنيەجۇزىلىك كوشپەندىلەر ويىندارى ستيلىندە بەزەندىرىلگەن قازاقستاندىقتار تىككەن كيىز ءۇيدى تاماشالادى.
ىستامبۇلداعى فەستيۆالدە قازاقستاندىق پالۋاندار ءبىرجان قوسالييەۆ پەن سىرىم ءىزباساروۆ اۋدارىسپاق سپورتى بويىنشا ونەر كورسەتتى. قوس پالۋان دا - قازاقستاننىڭ جانە ازيانىڭ بىرنەشە دۇركىن چەمپيونى، سونداي- اق، 2-دۇنيەجۇزىلىك كوشپەندىلەر ويىندارىنىڭ جەڭىمپازدارى. سونىمەن قاتار، قازاقستان قۇراماسىنىڭ مۇشەلەرى -ناريمان ءاسىمجان مەن ازات تۇلكىباي تۇركيا تورىندە ۇلتتىق سپورتىمىز تەڭگە ءىلۋدى تانىستىردى.
فەستيۆال اياسىندا بۇكىل الەمدىك ەتنوسپورت كونفەدەراتسياسىنىڭ پرەزيدەنتى نەدجمەتتين بيلال ەردوعان ۇلتتىق سپورت فەدەراتسيالارىنىڭ باسشىلارىمەن كەزدەستى.
كەزدەسۋ باراسىندا ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ استانادا وتەتىن 5- دۇنيەجۇزىلىك كوشپەندىلەر ويىندارىنا دايىندىق تۋرالى ايتتى.
«5-دۇنيەجۇزىلىك كوشپەندىلەر ويىندارىنا قارقىندى دايىندىق ءجۇرىپ جاتىر. قازىرگى تاڭدا وعان 84 مەملەكەت قاتىساتىنىن راستادى. ءبىز بارلىق ەلدىڭ دەلەگاتسياسىن قىركۇيەكتە استاناعا كەلىپ، ءداستۇرلى سپورت تۇرلەرىنىڭ ءدۇبىرلى دوداسىن تاماشالاۋعا شاقىرامىز»، - دەدى ي. سالجانوۆ.
ايتا كەتەيىك، ەتنوسپورت مادەني فەستيۆالىن بۇكىل الەمدىك ەتنوسپورت كونفەدەراتسياسى ءداستۇرلى سپورت تۇرلەرىن ساقتاي وتىرىپ، ولاردى دامىتۋ ماقساتىندا 6 جىل قاتارىنان وتكىزىلىپ كەلەدى. جىل سايىن اتالعان فەستيۆالگە ميلليونعا جۋىق ادام قاتىسادى.
اۆتور
ەربول جانات