قازاقستاندىق ءانشى «سلاۆيان بازارى» بايقاۋىندا ءبىرىنشى ورىن الدى

استانا. KAZINFORM - بەلارۋستە «ۆيتەبسك-2024» ەسترادالىق ءان ورىنداۋشىلار بايقاۋى اياقتالدى. ونداعى باس جۇلدەنى مولدوۆالىق ءانشى كارولينا بالان، ال ءبىرىنشى ورىندى قازاقستاندىق ەرنازار جۇبان جەڭىپ الدى.

بۇل تۋرالى Kazinform بەلتا اگەنتتىگىنە سىلتەمە جاساپ حابارلايدى.

ەكىنشى ورىندى يتاليالىق ماريام تانكرەدي مەن رەسەيلىك ەكاتەرينا كۋزينا ءبولىستى. قازىلار القاسىنىڭ ءۇشىنشى ورىنعا قاتىستى شەشىمى ۇقساس بولدى، بۇل جۇلدە بولگاريالىق ۆالەريا چۋچمان مەن بەلارۋس نيەۆەنا پەيكوۆاعا بەرىلدى.

سونداي-اق، ۆەنەسۋەلا، يسپانيا، لاتۆيا، سلوۆەنيا، تۇركيا، وزبەكستان، حورۆاتيا، چەحيا جانە وڭتۇستىك افريكا ەلدەرىنىڭ وكىلدەرى بايقاۋدىڭ ديپلومانتتارى اتاندى. ال وڭتۇستىك افريكادان كەلگەن Thami Mbatha ۇلتتىق تاقىرىپتى ۇزدىك ورىنداعانى جانە جوعارى ورىنداۋشىلىق شەبەرلىگى ءۇشىن ۆلاديمير مۋلياۆين اتىنداعى ارنايى سىيلىقتى الدى.

بەلارۋس جانە رەسەي وداعى پارلامەنتتىك جينالىسىنىڭ ارنايى جۇلدەلەرى بەلارۋس ۆالەريا چۋچمان مەن رەسەيلىك ەكاتەرينا كۋزيناعا بەرىلدى. «مير» مەملەكەتارالىق تەلەراديوكومپانياسىنىڭ ۇلتتىق داستۇرلەردى ساقتاۋداعى جوعارى شەبەرلىگى ءۇشىن «ءان-دوستاستىقتى ساقتاۋعا جول» ارنايى ماراپاتى وزبەكستان وكىلى ءساليماعا بەرىلدى.

بەلارۋس پرەزيدەنتى بەكىتكەن «سلاۆيان ءۇمىتى» ارنايى سىيلىعىمەن لاتۆيادان كەلگەن Kaleriya ماراپاتتالدى. ونى پرەمەر-ءمينيستردىڭ ورىنباسارى، فەستيۆالدىڭ ۇيىمداستىرۋ كوميتەتىنىڭ ءتوراعاسى يگور پەتريشەنكو تابىس ەتتى.

بايقاۋدىڭ العاشقى كۇنى قاتىسۋشىلار بەلارۋس رەسپۋبليكاسى پرەزيدەنتتىك وركەسترىنىڭ سۇيەمەلدەۋىمەن سلاۆيان ءحيتىن ورىندادى، ال ەكىنشى كۇنى قاتىسۋشىلار «-1» فونوگرامماسىمەن الەمدىك حيتتەردى شىرقادى.

ونەرپازداردى رەسەي، مولدوۆا، مەكسيكا، دانيا جانە بولگاريادان كەلگەن تانىمال انشىلەر مەن پروديۋسەرلەر باعالادى. حالىقارالىق قازىلار القاسىن ءانشى، قازاق ك س ر حالىق ءارتىسى روزا رىمبايەۆا باسقاردى.

ەستەرىڭىزگە سالساق، بۇعان دەيىن ساعىن ءومىرباي ۇلى «سلاۆيان بازارىنىڭ» بالالار بايقاۋىندا ەكىنشى ورىن العانىن جازعان ەدىك.