قازاقستاندىق عالىم جاڭا ولشەۋ قۇرىلعىسىن ويلاپ تاپتى
استانا. KAZINFORM - ەلىمىزدە العاش رەت اۋا ىلعالدىلىعىن ولشەۋ تەحنولوگياسى جاسالدى. ونى دايىنداپ شىعارعان نەبارى 27 جاستاعى جاس عالىم اسىلبەك جۇماعالي. «قازستاندارت» ر م ك باس مامانى «بۇگىن LIVE» باعدارلاماسىنا ونلاين بايلانىسقا شىعىپ، ءوزىنىڭ جاڭا تەحنولوگياسى تۋرالى باياندادى.
- ءبىزدىڭ مەكەمەدە ەڭ جوعارعى دالدىكتەگى ەتالوندار جۇمىس ىستەيدى. بىزدەگى جەتىلدىرىلگەن ەتالون - شىق پەن قىراۋ نۇكتەسىنىڭ تەمپەراتۋراسى بويىنشا ەتالون بولىپ ەسەپتەلەدى. ونىڭ نەگىزگى ولشەۋ ءۇردىسى فۋندامەنتالدى ادىستە جاسالعان. ەتالوننىڭ نەگىزگى ەلەمەنتى - قانىقتىرعىش. قانىقتىرعىش شاعىن كولەمدى، 4 ليترلىك سۇيىق تەرموستاتقا ورنالاستىرىلادى. تەرموستاتتىڭ تەمپەراتۋراسىن قانىقتىرعىشتىڭ تەمپەراتۋراسىمەن بىردەي قىلىپ، جوعارعى دالدىكتە ناتيجەسىن الامىز، - دەيدى عالىم.
اسىلبەك جۇماعالي ءوزى جاساپ شىعارعان اۋا ىلعالدىلىعىن ولشەۋ تەحنولوگياسىن پاتەنتتەپ تە ۇلگەرىپتى.
- قانىقتىرعىشتىڭ پايدالى مودەل پاتەنتىن وتكەن جىلى الدىق. ءبىراق پاتەنت العانىمەن، ونىڭ دالدىك كورسەتكىشتەرىن دالەلدەۋ ءۇشىن حالىقارالىق سالىستىرۋ جۇرگىزۋ كەرەك. ال ونىڭ ناتيجەسى ءبىر اي بۇرىن عانا شىقتى، - دەيدى ول.
ايتا كەتەيىك، جۋىردا قازاقستان مەن قىتايدىڭ بىرلەسكەن عىلىم جانە تەحنولوگيا مەكتەبى اشىلماق.