قازاقستاندىق بوكسشىلار ماجارستاندا وتكەن حالىقارالىق تۋرنيردە بەس التىن الدى

استانا. KAZINFORM - قازاقستاندىق بوكسشىلار دەبرەتسەندە (ماجارستان) يشتۆان بوچكايدى ەسكە الۋعا ارنالعان حالىقارالىق تۋرنيردە بەس التىن الدى.

بارلىعى 9 قازاقستاندىق سپورتشى فينالعا شىقسا، سونىڭ بەسەۋى چەمپيون اتاندى.

اتاپ ايتقاندا، اسحات ءجۇسىپوۆ 48 كەلىگە دەيىنگى سالماقتا ۋكراينالىق اندرەي تيشكوۆەچتى باسىم داۋىسپەن جەڭدى.

سونداي-اق اسىلجان سەرىكباي (57 ك گ) ماجارستاندىق رولاند ۆەرەشتى، بيبارىس جەكسەن (60 ك گ) تاعى ءبىر شارشى الاڭ يەسى كرۋزيتو كوۆاچتى، ەرتۋعان زەينۋللينوۆ (63,5) ريچارد كوۆاچتى باسىم داۋىسپەن ۇتتى. ەراسىل جاكپەكوۆتىڭ (80 ك گ) قارسىلاسى، ماجارستاندىق پال كوۆاچ رينگكە شىقپاعاندىقتان، جەڭىس قازاقستاندىق بوكسشىعا بەرىلدى.

دانيال ءسابيت (51 ك گ) ماجارستاندىق اتتيلا بەرناتقا باسىم داۋىسپەن ەسە جىبەردى. تاعى ءبىر ماجارستاندىق گابور ۆيربان (54 ك گ) كەنجە مۇرات ۇلىن تورەشىلەردىڭ ءبىراۋىزدان شەشىمىمەن قاپى قالدىردى.

سابىرجان اققالىقوۆ (71 ك گ) ۋكراينالىق يۋري زاحارەيەۆكە باسىم داۋىسپەن جول بەردى. تەمىرلان مۇقاتايەۆ تا (86 ك گ) ۋكراينالىق دانيل جاساننان جەڭىلىپ قالدى - 0:5.