قازاقستاندىق بوكسشى قىز وزگە ەلدىڭ اتىنان جۇدىرىقتاسادى

بوكستان قازاقستان چەمپيونى ۆلاديسلاۆا كۋحتا سپورتتاعى ازاماتتىعىن اۋىستىرىپ، ۆەنگريا قۇراماسى ساپىنا اۋىستى.

بۇل تۋرالى سپورتشىنىڭ ءوزى Instagram جەلىسىندەگى پاراقشاسىندا جازدى، - دەپ حابارلايدى Vesti.kz.

بوكسشى قىز 2020 جانە 2022-جىلى قازاقستان چەمپيوناتىندا توپ جارعان. جەڭىستى ساتتەرىنەن جيناقتالعان ۆيدەو جاريالاپ، ءوز شەشىمى جايلى تارقاتىپ جازدى.

مەنىڭ سپورتتاعى مانسابىما قاتىستى كوپتەگەن سۇراق قويىلدى، ستوريستەردە دە كورىنبەي كەتۋىمنىڭ سەبەبى بولدى. بيىل مەن ءۇشىن تاعدىرشەشتى جىل بولدى. ءوز ەڭبەگىمدى، جاتتتىقتىرۋشىمنىڭ ەڭبەگىن زايا كەتىرگىم كەلمەدى. سوندىقتان دا تاۋەكەلگە بەل بۋدىم. وسى جىلعى باستى شەشىمىم - سپورتتاعى ازاماتتىعىمدى اۋىستىرۋ. مەن ەندى ۆەنگريا قۇراماسى ساپىندا جۇدىرىقتاسامىن. قازاقستان مەنىڭ جۇرەگىمدە قالادى. ءبىراق مەنىڭ تاعدىرىما وسىلاي جازىلعان ەكەن. تۇسىنگەندەر تۇسىنەدى. ماعان سەنىپ، قولداۋ بىلدىرگەن جانە بىلدىرەتىن جاندارعا راقمەتىمدى ايتامىن، - دەپ جازدى سپورتشى.

«ن ك» باسىلىمىنا بەرگەن سۇحباتىندا ۆلاديسلاۆا كۋحتا حالىقارالىق جارىستارعا (الەم چەمپيوناتى، ازيا ويىندارى) قاتىسپاعانى جايلى، قۇرامادا ريمما ۆولوسەنكوعا سەنىم ارتاتىنى تۋرالى ايتا كەتكەن.

ۆەنگريا بوكس فەدەراتسياسى ۆلاديسلاۆا مەن جاتتىقتىرۋشىسى اكزام بارلىبايەۆقا 2022-جىلى ۇسىنىس جاساعان. ول كەزدە قازاقستاندىق بوكسشى ۇلتتىق قۇراماعا ىلىگۋ جايىن ويلاپ، ۇسىنىستى كەرى قايتارعان.

ءساۋىر ايىندا ۆەنگريا بوكس فەدەراتسياسى كەزەكتى رەت جاتتىقتىرۋشىما ۇسىنىس ايتتى. ولار مەنىڭ نەگە الەم چەمپيوناتىنا قاتىسپاعانىما قاراپ، بىرگە جاتتىعۋعا شاقىردى. ءبىز ۇزاق ويلانا كەلە، اقىل تارازىسىنا سالىپ بارىپ وسى شەشىمگە كەلدىك. سپورتتىق مانساپتى جوعارى دارەجەدە جالعاستىرۋعا بۇل ءبىر مۇمكىندىك بولدى. ماۋسىم ايىندا ۆەنگرياعا بارىپ، وقۋ-جاتتىعۋ جيىندارىنا قاتىسىپ، تالاپتارىمەن تانىستىق. قىركۇيەك ايىندا IBA شەشىمىمەن ۆەنگريا قۇراماسىنا قابىلداندىم. ءوز ەلىمنىڭ اتىنان شىققىم-اق كەلەدى، ءبىراق جاعداي وسىلاي بولدى، - دەيدى ۆلاديسلاۆا.

قازاقستاندىق بوكسشى قىز ۆەنگريا چەمپيوناتىنا قاتىسىپ ۇلگەرگەن. وندا قارسىلاستارىنىڭ ءبارىن جەڭىپ، ەل چەمپيونى اتاندى. قازىرگى تاڭدا ۆەنگريا قۇراماسى ساپىندا جاتتىعۋىن جالعاستىرىپ، الداعى ۋاقىتتا پاريج وليمپياداسى جولداماسىنا ليتسەنزيا بەرەتىن جارىستاردا باق سىنايدى.

جىلدى جاقسى قورىتىندىلادىق، ءبىراق بۇل جۇمىستاردىڭ باسى عانا. الدا مەنى ارمانىما جەتەلەيتىن كوپتەگەن جارىس كۇتىپ تۇر. جەكە جاتتىقتىرۋشىم اكزام بارلىبايەۆقا العىسىمدى بىلدىرەمىن. جاقسى جەتىستىك پەن جوعارى ناتيجە كورسەتۋىمە كۇش سالىپ كەلەدى. قولداۋشىلارعا راقمەتىمدى ايتامىن، - دەيدى بوكسشى قىز.

ۆلاديسلاۆا كۋحتا قازاقستان چەمپيوناتىندا 57 كيلودا ەكى رەت چەمپيون بولدى. 2015-جىلى جاس وسپىرىمدەر اراسىندا وتكەن الەم چەمپيوناتىندا قولا مەدال ەنشىلەگەن.