قازاقستاندىق بالۋان ريزابەك ايتمۇحان الەم چەمپيوناتىنىڭ فينالىندا ونەر كورسەتەدى
استانا. KAZINFORM - قازاقستاندىق بالۋان ريزابەك ايتمۇحان يسپانيانىڭ پونتيەۆەدرا قالاسىندا كۇرەس تۇرلەرىنەن 20 جاسقا دەيىنگىلەر اراسىندا ءوتىپ جاتقان الەم چەمپيوناتىنىڭ فينالىنا جولداما الدى.
قازاقستاندىق ەركىن كۇرەس شەبەرى 97 كەلىگە دەيىنگى سالماقتا الدىمەن يراندىق ابولفازلا داۆۋد بابالانى 12:1 ەسەبىمەن مەرزىمىنەن بۇرىن تىزە بۇكتىردى. سودان كەيىن شيرەك فينالدا گرەكيالىق نيكولاوس كاراۆانوستى ءدال سونداي ەسەپپەن قاپى قالدىردى.
ريزابەك جارتىلاي فينالدا امەريكالىق دجاستين رەيدماحەردى دە ايقىن باسىمدىلىقپەن ۇتتى - 9:1. فينالدىق بەلدەسۋ 7-قىركۇيەك كۇنى بولادى.
ريزابەك ايتمۇحان وتكەن جىلى 19 جاسىندا ەرەسەكتەر اراسىندا 92 كەلىگە دەيىنگى سالماقتا ايدى اسپانعا شىعارىپ، تاۋەلسىز قازاقستان تاريحىندا ەركىن كۇرەستەن العاش رەت الەم چەمپيونى اتانعان بولاتىن.
ەسكە سالا كەتەيىك، بۇدان بۇرىن قازاقستاندىق بالۋاننىڭ جاستار اراسىندا الەم چەمپيونى اتانعانىن جازعان بولاتىنبىز.