قازاقستاندىق اۋىل شارۋاشىلىعى ونىمدەرىن قىتايعا ەكسپورتتاۋ كولەمى ارتۋى مۇمكىن
استانا. KAZINFORM - ق ح ر-دا ق ر اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى قىتاي حالىق رەسپۋبليكاسىنىڭ باس كەدەن باسقارماسى باسشىسىنىڭ ورىنباسارى ۆاڭ لينجيۋنمەن كەزدەستى. بۇل تۋرالى ا ش م باسپا ءسوز قىزمەتى حابارلادى.
كەلىسسوزدەردىڭ نەگىزگى تاقىرىبى فيتوسانيتاريالىق جانە ۆەتەريناريالىق قاۋىپسىزدىك سالاسىنداعى ىنتىماقتاستىقتى كەڭەيتۋ، سونداي- اق قازاقستاندىق اگرارلىق ءونىمنىڭ قىتاي نارىعىنا ەكسپورت كولەمىن ارتتىرۋ شارالارىن تالقىلاۋ بولدى.
كەلىسسوزدەر بارىسىندا تاراپتار فيتوسانيتاريالىق باقىلاۋ جونىندەگى ۇلتتىق تالاپتار مەن راسىمدەر تۋرالى اقپارات الماستى، كارانتيندىك ءونىمدى تاسىمالداۋ كەزىندە ءوزارا ءىس-قيمىلدى وڭتايلاندىرۋ جولدارىن قاراستىردى.
ديالوگتىڭ نەگىزگى تاقىرىپتارىنىڭ ءبىرى - قانت قىزىلشاسىنىڭ جومىن وندىرەتىن قازاقستاندىق كاسىپورىنداردى بىرلەسىپ تەكسەرۋدى ۇيىمداستىرۋ، جاڭا وڭىرلەردى قوسۋ ارقىلى ق ح ر-نا بيداي مەن ارپانى ەكسپورتتاۋ گەوگرافياسىن كەڭەيتۋ، سونداي-اق قىتاي نارىعىن جاڭا وسىمدىك شارۋاشىلىعى ونىمدەرى - كۇرىش، ماقتا، قاۋىن جانە قاربىز ءۇشىن اشۋ بولدى.
- مال شارۋاشىلىعى ءونىمىن قىتايعا ەكسپورتتاۋدى كەڭەيتۋ ماسەلەسىنە ەرەكشە نازار اۋدارىلدى. تامىز ايىنىڭ سوڭىندا قازاقستاندىق قۇس فابريكالارىنا ق ح ر ينسپەكتسيالىق توبىنىڭ تەكسەرۋى باستالادى دەپ كۇتىلىپ وتىر.
سونداي-اق سيىر تەرىلەرى، قۇس ەتى مەن سويىس مالىنا ارنالعان ۆەتەريناريالىق سەرتيفيكاتتاردى جەدەل كەلىسۋدى قوسا العاندا، سالقىنداتىلعان جانە تەرميالىق وڭدەلگەن ونىمدەردى قامتيتىن سيىر ەتى، قوي ەتى جانە شوشقا ەتى ەكسپورتىنا قاتىستى ۆەتەريناريالىق حاتتامالاردى وزەكتەندىرۋ ماسەلەلەرى قارالدى، - دەلىنگەن حابارلامادا.
تاراپتار فيتوسانيتاريالىق جانە ۆەتەريناريالىق باقىلاۋدىڭ تيىمدىلىگىن ارتتىرۋعا، ەكىجاقتى ساۋدا راسىمدەرىن جەدەلدەتۋگە باعىتتالعان ساراپتامالىق ديالوگتى دامىتۋ مەن ىنتىماقتاستىقتى تەرەڭدەتۋگە ءوزارا مۇددەلىلىك ءبىلدىردى.
ينسپەكسيالاردى وتكىزۋ جانە ءتيىستى قۇجاتتارعا قول قويۋ قازاقستان مەن قىتاي اراسىنداعى ساۋدا-ەكونوميكالىق بايلانىستاردى دامىتۋدا، سونداي-اق قىتاي نارىعىنا ساپالى ءارى قاۋىپسىز ءونىمنىڭ تۇراقتى جەتكىزىلىمىن قامتاماسىز ەتۋدە ماڭىزدى قادام بولماق.
ايتا كەتەلىك فەرمەرلەردى قارجىلاي قولداۋ كۇشەيەدى: كرەديتتەر مەن ليزينگتى سۋبسيديالاۋ قاعيداسى وزگەردى.