قازاقستاندىق 74 جاستاعى ساياحاتشى قىتاي استاناسىنا جاياۋ جەتتى
استانا. KAZINFORM - تامىز ايىنىڭ باسىندا قازاقستاندىق سارسەنباي قوتىراشوۆ قازاقستاننان قىتايعا جاياۋ ساپارىن باستادى. اتاقتى ساياحاتشى بۇگىن مىڭداعان شاقىرىم جول ءجۇرىپ، قىتاي استاناسى - بەيجىڭ قالاسىنا جەتتى.
اقساقال ءۇشىنشى جورىق ساپارىن شىعىس قازاقستان وبلىسىنان التاي مەن موڭعوليا ارقىلى قىتايعا باستادى. قىركۇيەكتىڭ اياعىندا موڭعوليا-قىتاي شەكاراسىنان ءوتىپ، قازان ايىنىڭ باسىندا بەيجىڭگە جەتتى.
ساياحات كەزىندە سارسەنباي قوتىراشوۆ قازاقستاننىڭ تاريحى مەن مادەنيەتى تۋرالى اڭگىمەلەيدى. سونىمەن قاتار ول ءوزى باراتىن باسقا ەلدەردىڭ مادەنيەتى مەن داستۇرىمەن تانىسادى.
ساياحات اراسىنداعى ۇزىلىستەردە اقساقال جەزقازعانداعى زاۋىتتا تەمىر ۇستاسى قىزمەتىن جالعاستىرادى.
سارسەنباي قوتىراشوۆ 2022-جىلى جارتى جىلدا قازاقستان بويىنشا 8 مىڭ شاقىرىم جول ءجۇرىپ ءوتتى. بىلتىر اتىراۋدان ىستانبۇلعا جاياۋ باردى.
- بۇكىل الەمگە تىنىشتىق تىلەيمىن. حالىقتار اراسىندا بەيبىتشىلىك ورناسىن، - دەيدى اقساقال.
ساياحاتشى كەلەر جىلعا ءتورتىنشى ساپارىن جوسپارلاپ وتىر. 2025-جىلى ول سولتۇستىك امەريكاعا جەتىپ، اتلانت مۇحيتىنىڭ جاعاسىنان تىنىق مۇحيتىنىڭ جاعاسىنا دەيىن ءجۇرىپ وتپەكشى.
ايتا كەتەيىك، ايگىلى قازاق ساياحاتشىسى سارسەنباي قوتىراشوۆتىڭ الەم بويىنشا جاياۋ ساياحاتى 2023-جىلدىڭ 2-تامىزىندا باستالعان. اقساقال قازاقستان - رەسەي - گرۋزيا - تۇركيا - بولگاريا - سەربيا - ۆەنگريا - اۋستريا - گەرمانيا - فرانسيا - ا ق ش - قىتاي - موڭعوليا - رەسەي - قازاقستان باعىتى بويىنشا ساياحاتتاۋدى جوسپارلاپ وتىر.