قازاقستاندىق 16 جاستاعى تەننيسشى العاشقى ميلليوندارىن تاپتى

استانا. KAZINFORM - قازاقستاندىق تەننيسشى ءامىر ومارحانوۆ ATP ساناتىنداعى تۋرنيردە يسپانيالىق روبەرتو باۋتيستا اگۋتقا قارسى كەزدەسۋ وتكىزىپ، دەبيۋت جاسادى، - دەپ حابارلايدى Massaget.kz ءتىلشىسى.

قازاقستاندىق 16 جاسار ۆۋندەركيند مادريدتە (يسپانيا) ءوتىپ جاتقان بەدەلدى Masters ساناتىنداعى تۋرنيرىنە قاتىسۋ ءۇشىن wild card الدى. ومارحانوۆ ىرىكتەۋ كەزەڭىنىڭ ءبىرىنشى اينالىمىندا كورت يەسى، الەمنىڭ بۇرىنعى توعىزىنشى راكەتكاسى - تاجىريبەلى روبەرتو باۋتيستا اگۋتپەن (الەمدىك رەيتينگىدە 86-ورىن) كەزدەستى.

ماتچ 6:2، 6:1 ەسەبىمەن يسپانيالىق تەننيسشىنىڭ جەڭىسىمەن اياقتالدى، ءبىراق جاس تەننيسشى ءامىر ومارحانوۆ قارسىلاسىن اناعۇرلىم كۇشتى سوققىسىمەن تاڭعالدىردى.

وعان ءتىپتى ATP 1000 ساناتىنداعى تۋرنيردىڭ ىرىكتەۋ كەزەڭىنە قاتىسقانى ءۇشىن اقشالاي سىياقى دا بەرىلدى. ءامىر ومارحانوۆ 6 مىڭ 130 ەۋرو، ياعني 2,9 ميلليون تەڭگە تابىس تاپقان.

ەسكە سالايىق، ءامىر ومارحانوۆ بيىل جاس وسپىرىمدەر اراسىنداعى Australian Open تۋرنيرىنىڭ شيرەك فينالىنا دەيىن جەتكەن ەدى.