قازاقستاندى ماقتان تۇتامىن: رەسەيلىك تەلەجۇرگىزۋشى بيشىمبايەۆتىڭ ءىسى تۋرالى ايتتى

الماتى. KAZINFORM - رەسەيلىك تەلەجۇرگىزۋشى جانە جۋرناليست كسەنيا سوبچاك مارقۇم سالتانات نۇكەنوۆانىڭ ىسىنە قاتىستى پىكىر ءبىلدىردى.

ورتالىق ازيا ايەلدەرىنىڭ فورۋمىنا ارنايى كەلگەن كسەنيا سوبچاك تۇرمىستىق زورلىق-زومبىلىقتان قايتىس بولعان سالتانات نۇكەنوۆانىڭ سوتى تۋرالى ايتتى.

«وزدەرىڭىز بىلەسىزدەر مەن كوكتەمدە قازاقستانعا قايعىلى جاعدايدا كەلدىم. تۇرمىستىق زورلىق-زومبىلىقتىڭ قۇربانى بولعان سالتانات نۇكەنوۆانىڭ سوتى تۋرالى ايتىپ وتىرمىن. مەن قوعامدىق رەزونانس تۋدىرعان ماسەلەنى اشىق كورسەتىپ، دۇرىس شەشىم قابىلداعانى ءۇشىن قازاقستاندى ماقتان تۇتامىن»، - دەدى ول.

ونىڭ ايتۋىنشا، سانانى وزگەرتۋ ەڭ قيىن نارسە جانە ونى بىرتىندەپ جۇزەگە اسىرۋ كەرەك.

«ال قوعامنىڭ قىسىمى جاعدايدى قالاي وزگەرتە باستادى، زورلىق-زومبىلىق قۇرباندارىنا دەگەن كوزقاراس وزگەردى»، - دەدى كسەنيا سوبچاك.

سونداي-اق، ول قازاقستاندىق ايەلدەردىڭ نازىك ءارى ەر مىنەزدى ەكەنىن تىلگە ەرەكشە اتاپ ءوتتى.

ەسكە سالساق، 2023 -جىلى 9-قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى.

بۇل ءىس ەلىمىزدە ۇلكەن قوعامدىق رەزونانس تۋدىرىپ، سوت وتىرىستارى ونلاين ءوتتى. ناتيجەسىندە قۋاندىق بيشىمبايەۆ 24 جىلعا باس بوستاندىعىنان ايىرىلدى.

وسى پروتسەستەر كەزىندە كسەنيا سوبچاك سوت وتىرىسىنا قاتىسۋ ءۇشىن قازاقستانعا ارنايى كەلگەن بولاتىن.

كەيىن ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ رەسەيلىك جۋرناليست كسەنيا سوبچاك پەن بلوگەر ناتاليا گرەيستىڭ قازاقستانداعى سوت وتىرىسىنا قاتىسۋى تۋرالى پىكىر ءبىلدىردى.

ايتا كەتەيىك، بيىل 12-ساۋىردە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى مەن ىلەسپە قۇجات ەكى وقىلىمدا قارالىپ، ماقۇلدانعان ەدى. ءدال وسى زاڭ ەل ىشىندە عانا ەمەس كورشىلەس رەسەي قوعامىندا دا قىزۋ تالقىعا تۇسكەن ەدى.

اۆتور
الما مۇقانوۆا