قازاقستانداعى اۋىل كىتاپحانالارىنا مەملەكەت باسشىسىنىڭ اتىنان كوركەم ادەبيەتتەر تابىستالدى

استانا. KAZINFORM - مەملەكەت باسشىسى قاسىم-جومارت توقايەۆتىڭ اتىنان قازاقستاننىڭ 100 اۋىلىنىڭ كىتاپحانالارىنا كوركەم ادەبيەتتەر سىيعا تارتىلدى، دەپ حابارلايدى ق ر مادەنيەت جانە اقپارات مينيسترلىگى.

پرەزيدەنت تارتۋى «اۋىل كىتاپحانالارىنا 100 كىتاپ» اكسياسى اياسىندا تابىس ەتىلدى.

ەسكە سالايىق، اتىراۋدا وتكەن ۇلتتىق قۇرىلتايدا مەملەكەت باسشىسى قازاقستاندا «كىتاپ وقيتىن ۇلتتى» قالىپتاستىرۋ قاجەتتىگىنە باسا نازار اۋدارعان بولاتىن.

«شىن مانىندە، وزىق ويلى ۇلت بولۋدىڭ ەڭ توتە جولى - كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك»، - دەدى قاسىم- جومارت توقايەۆ.

پرەزيدەنت باستاماسى وتاندىق جانە الەمدىك ادەبيەتتىڭ سوڭعى ۇلگىدەگى تۋىندىلارىن شالعايداعى اۋىل كىتاپحانالارىنا جەتكىزىپ، وسكەلەڭ ۇرپاقتىڭ كىتاپ وقۋعا دەگەن قىزىعۋشىلىعىن ارتتىرۋعا باعىتتالىپ وتىر.

كىتاپتار مەملەكەت باسشىسىنىڭ اتىنان ەلىمىزدىڭ دامۋىنا ەلەۋلى ۇلەس قوسقان مەملەكەت جانە قوعام قايراتكەرلەرىنىڭ، سوعىس ارداگەرلەرىنىڭ، بەلگىلى قالامگەرلەر مەن مادەنيەت مايتالماندارىنىڭ، عالىمداردىڭ تۋىپ-وسكەن اۋىلدارىنا جولداندى.

اكسيا اياسىندا حالىق قاھارمانى ساعادات نۇرماعامبەتوۆتىڭ، قازاقتىڭ قاھارمان قىزدارى ءاليا مولداعۇلوۆا، مانشۇك مامبەتوۆا، حيۋاز دوسپانوۆانىڭ، تالانتتى اكتەر ءارى رەجيسسەر شاكەن ايمانوۆتىڭ، كورنەكتى اقىن ءىلياس جانسۇگىروۆتىڭ، جازۋشى گەرولد بەلگەردىڭ تۋىپ-وسكەن اۋىلدارىنداعى كىتاپحانا قورلارى تولىقتى.

سونداي-اق ءشامشى قالداياقوۆ، قاسىم امانجولوۆ، كەمەل اقىشوۆ، ءابىش كەكىلباي ۇلى، فاريزا وڭعارسىنوۆا، ءابىلحان قاستەيەۆ، ءبىرجان سال، ساكەن سەيفۋللين، تولەۋ كوبدىكوۆ، كەنەن ازىربايەۆ سەكىلدى بەلگىلى تۇلعالاردىڭ جانە باسقا دا ءبىرقاتار اۋىلدارعا كىتاپتار توپتاماسى جولداندى. اۋىل كىتاپحانالارىنا بەرىلگەن كىتاپتار اراسىندا الەم جانە قازاق ادەبيەتىنىڭ ۇزدىك شىعارمالارى، بالالار ادەبيەتىنىڭ جاۋھارلارى، كوميكستەر، قازىرگى زامانعى پروزا مەن پوەزيا، تاريحي، تانىمدىق- اعارتۋشىلىق ادەبيەتتەر بار. مەملەكەت باسشىسىنىڭ اتىنان بارلىعى 100 اۋىلعا 10 مىڭ كىتاپ سىيعا بەرىلدى.

«اۋىل كىتاپحانالارىنا - 100 كىتاپ» اكسياسىنا پارلامەنت سەناتىنىڭ ءتوراعاسى ماۋلەن اشىمبايەۆ، ق ر پرەزيدەنتى اكىمشىلىگىنىڭ باسشىسى ايبەك دادەباي، مينيسترلەر، ءتۇرلى ۇيىمداردىڭ باسشىلارى مەن بەلسەندى ازاماتتار قولداۋ كورسەتۋدە.

اكسيا ءالى جالعاسۋدا.