قازاقستاندا جاڭا ۆيزا پايدا بولدى
استانا. KAZINFORM - مەملەكەت باسشىسى قاسىم-جومارت توقايەۆتىڭ تاپسىرماسى بويىنشا Neo Nomad دەپ اتالاتىن جاڭا ۆيزا ءتۇرى ەنگىزىلدى.
بۇل ۆيزا زاماناۋي كوشپەندىلەرگە - ساياحاتتاپ، قاشىقتان جۇمىس ىستەيتىن شەتەلدىك تۋريستەرگە ارنالعان.
جاڭا ۆيزالىق رەجيم پاندەميادان كەيىن وسىنداي باعدارلامالاردى ءساتتى ەنگىزگەن 50 دەن استام ەلدىڭ حالىقارالىق تاجىريبەسىن نازارعا العان.
Neo Nomad ۆيزاسىن الۋ ءۇشىن شەتەلدىك ازامات قازاقستاننان تىس جەردە تۇراقتى كىرىسىنىڭ بار ەكەنىن دالەلدەۋى كەرەك، ونىڭ مولشەرى ايىنا كەمىندە 3000 ا ق ش دوللارىن قۇراۋى قاجەت. سونىمەن قاتار نەگىزگى كىرىس تالاپتارىنان باسقا، شەتەلدىك ءوتىنىش بەرۋشىگە مەديتسينالىق ساقتاندىرۋ جانە سوتتىلىعىنىڭ جوقتىعى تۋرالى انىقتاما تالاپ ەتىلەدى.
ۆيزا قاشىقتان جۇمىس ىستەيتىن تۋريستەرگە، ياعني باعدارلامالاۋ، ماركەتينگ، قارجى، كونسالتينگ، ديزاين جانە ەلەكتروندى كوممەرتسيا سياقتى ءتۇرلى سالالاردا قىزمەت ەتەتىن شەتەلدىك ازاماتتارعا ارنالعان. ۆيزا يەلەرىنىڭ ءبىر جىلعا دەيىن قازاقستاندا تۇرۋعا مۇمكىندىگى بار. وسى ۋاقىت ىشىندە ولار شەتەلدىك كومپانيالاردا جۇمىس ىستەي الادى. بۇل شەتەلدىك تۋريستەرگە قازاقستان مادەنيەتى مەن تۇرمىسىن جاقىنىراق تانۋعا مۇمكىندىك بەرسە، ەلگە ەكونوميكالىق پايدا اكەلەدى دەپ كۇتىلۋدە.
ۆيزا ەنگىزىلگەن جاعدايدا جىلىنا ونى 500 ادام السا، ەكونوميكالىق اسەر شامامەن 3,6 ميلليارد تەڭگەنى قۇرايدى دەپ بولجانىپ وتىر. Neo Nomad ۆيزاسىن پايدالاناتىن شەتەلدىك ازاماتتار قازاقستاندا تۇرىپ، قاراجاتىن وسىندا جۇمسايدى، ءبىراق وتاندىق ەڭبەك نارىعىنا اسەر ەتپەيدى. بۇل باعدارلامانىڭ ماڭىزدى اسپەكتىسى.
«تۋريزم جانە سپورت، سىرتقى ىستەر، ىشكى ىستەر مينيسترلىكتەرى جانە باسقا دا مۇددەلى مەملەكەتتىك ورگانداردىڭ بىرلەسكەن جۇمىسىنىڭ ناتيجەسىندە قازاقستان زاماناۋي كوشپەندىلەردىڭ ساياحات كارتاسىنا ەندى. ولاردىڭ الەمدەگى سانى 35 ميلليوننان اسادى، ءبىز ولاردى ەلىمىزگە تارتۋ ءۇشىن بارلىق جاعدايدى جاساۋدى كوزدەپ وتىرمىز. اسىرەسە الماتى مەن استانا قالالارى نەو-كوشپەندىلەر ءۇشىن تارتىمدى 150 قالانىڭ قاتارىنا كىرەدى»، - دەدى تۋريزم جانە سپورت ءمينيسترى ەربول مىرزابوسىنوۆ.
وسىعان دەيىن Event tourism استاناداعى تۋريزم ترەندتەرىنىڭ بىرىنە اينالاتىنىن جازعان ەدىك.