قازاقستاندا ينۆەستورلارعا بارىنشا قولايلى جاعداي جاسايمىز - پرەزيدەنت

استانا. KAZINFORM - مەملەكەت باسشىسىنا Astana Think Tank فورۋمىنىڭ پلەنارلىق وتىرىسىندا ورتا دەرجاۆالاردىڭ ب ۇ ۇ مارتەبەسىن نىعايتۋ جانە مۋلتيلاتەراليزم قاعيداتتارىن ىلگەرىلەتۋ پروتسەسىندەگى ءرولى جايىندا سۇراق قويىلدى.

- البەتتە، الگىندە باياندامامدا ءبىز مۋلتيلاتەراليزمنىڭ جاقتاۋشىسى ەكەنىمىزدى ايتتىم. ءبىز الەم قازىر دە، بولاشاقتا دا، ەڭ الدىمەن، ب ۇ ۇ جارعىسىندا كورسەتىلگەن قاعيداتتارعا نەگىزدەلۋگە ءتيىس ەكەنىنە سەنىمدىمىز. ءبىز ب ۇ ۇ جارعىسىن ۇستانۋىمىز كەرەك. ەشكىمگە ونى بۇزۋعا قۇقىق بەرىلمەگەن. ويتكەنى ونىڭ بالاماسى جوق. ب ۇ ۇ جارعىسى - قازىرگى حالىقارالىق جۇيەنىڭ تىرەگى. بالكىم، ب ۇ ۇ- نىڭ رولىنە قاتىستى قانداي دا ءبىر كوڭىل تولماۋشىلىق بار شىعار، سىن دا ايتىلار. ءبىراق بىزگە كۇش-جىگەر بىرىكتىرىپ، سوعىس، قاقتىعىس اتاۋلىنى توقتاتىپ، كەرىسىنشە، ديالوگ پەن بەيبىتشىلىك جولىنا ءتۇسۋ قاجەت.

قازاقستان تۋرالى ايتار بولساق، رەفورمالاردى جالعاستىرىپ، كوزدەگەن ستراتەگيالىق جوسپاردى جۇزەگە اسىرۋ ءۇشىن بەيبىت جاعدايدا دامۋ ءبىز ءۇشىن اسا ماڭىزدى. قازىر ءبىزدىڭ الدىمىزدا ەلىمىزدىڭ ساياسي-ەكونوميكالىق الەۋەتىن ارتتىرۋعا قاتىستى اۋقىمدى مىندەت تۇر. سوندىقتان ءبىز بەيبىتشىلىكتى جاقتايمىز. بۇل رەتتە كوپجاقتى ىنتىماقتاستىق جاساپ وتىرعان دۇنيە جۇزىندەگى سەرىكتەستەرىمىزگە ريزاشىلىق بىلدىرەمىز. قازاقستان - حالىقارالىق نارىققا اشىق ەل. ءبىز شەتەلدەن تىكەلەي ينۆەستيتسيا تارتقىمىز كەلەدى. بۇل تۋرالى جاڭا ايتتىم. سول ءۇشىن قازاقستاندا قىزمەت ىستەگىسى كەلەتىن ينۆەستورلارعا بارىنشا قولايلى جاعداي جاسايمىز، - دەدى مەملەكەت باسشىسى ءوز جاۋابىندا.

اۆتور

ەربول جانات