قازاقستاندا ىشكى ساۋدا سالاسىنداعى بيزنەستى مەملەكەتتىك قولداۋدىڭ جاڭا تەتىگى ىسكە قوسىلادى
استانا. KAZINFORM - جوعارى اۋديتورلىق پالاتانىڭ نۇسقاۋىن ورىنداۋ شەڭبەرىندە قازاقستاندا ىشكى ساۋدا سۋبەكتىلەرىن مەملەكەتتىك قولداۋدىڭ جاڭا شارالارى ازىرلەنىپ، بەكىتىلدى.
ق ر جوعارى اۋديتورلىق پالاتا باسپا ءسوز قىزمەتىنىڭ حابارلاۋىنشا، بيىل ساۋدا جانە ينتەگراتسيا مينيسترلىگىنىڭ جانە ونىڭ ۆەدومستۆولىق باعىنىستى ۇيىمدارىنىڭ قىزمەتىنە مەملەكەتتىك اۋديت جۇرگىزىلدى. اۋديت بارىسىندا رەسپۋبليكادا ساۋدا ينفراقۇرىلىمىنىڭ ودان ءارى دامۋىن تەجەيتىن سەبەپتەردىڭ ءبىرى بيزنەستىڭ وسى باعىتتا ينۆەستيتسيالاۋ مۇمكىندىكتەرىنىڭ شەكتەۋلىگى ەكەنى انىقتالدى. وسىعان بايلانىستى ساۋدا جانە ينتەگراتسيا مينيسترلىگىنە كاسىپكەرلىك سۋبەكتىلەرىنىڭ قارجىلىق الەۋەتىن ارتتىرۋدىڭ ناقتى مەحانيزمدەرىن ايقىنداۋ تاپسىرىلدى.
ناتيجەسىندە ءمينيستردىڭ بيىل 21 -ماۋسىمداعى بۇيرىعىمەن ىشكى ساۋدا سۋبەكتىلەرىنە جەكە كاسىپكەرلىكتى مەملەكەتتىك قولداۋ شارالارىن كورسەتۋ قاعيدالارى بەكىتىلدى، ولار قازىرگى زامانعى ساۋدا ينفراقۇرىلىمىن قالىپتاستىرۋ بويىنشا ءىس-شارالاردى ىنتالاندىرۋعا باعىتتالعان.
ءبىرىنشى كەزەڭدە مەملەكەت بۇل باعىتقا 4 ميلليارد تەڭگە ءبولدى.
«دامۋ» قورىنان قارجىلاندىرۋدى وسى جىلدىڭ قازان ايىندا باستاۋ جوسپارلانۋدا.
سونداي-اق ەرەجەدە مەملەكەتتىك قولداۋ الۋشىلار ءۇشىن وتاندىق ءوندىرىستىڭ ازىق-تۇلىك جانە ازىق- تۇلىك ەمەس تاۋارلارىن ساۋدا ورىندارىنا ورنالاستىرۋ بويىنشا قارسى مىندەتتەمەلەر كوزدەلگەن. بۇل قازاقستاندىق تاۋار وندىرۋشىلەردىڭ ءونىمدى وتكىزۋ ارنالارىنا قولجەتىمدىلىگىن ارتتىرادى.
وسىعان دەيىن مەملەكەتتىك اۋديتتەن كەيىن ۇلتتىق پاركتەردە اباتتاندىرۋ جۇمىستارى باستالعانى حابارلاندى.
اۆتور
ايدار وسپاناليەۆ