قازاقستاندا وتەتىن دۇنيەجۇزىلىك كوشپەندىلەر ويىندارىنىڭ ماڭىزى نەدە؟

استانا. KAZINFORM - ۇلتتىق سپورت تۇرلەرى قاۋىمداستىعىنىڭ ۆيتسە-پرەزيدەنتى باقىتجان تۇرلىبەكوۆ قازاقستاندا دۇنيەجۇزىلىك كوشپەندىلەر ويىندارىن وتكىزۋدىڭ ماڭىزدىلىعىن ءتۇسىندىردى.

ول دۇنيەجۇزىلىك كوشپەندىلەر ويىندارىن قازاقستاندا وتكىزۋ تۋرالى قابىلدانعان شەشىمنىڭ بىرنەشە ماڭىزدى سەبەبىن اتاپ ءوتتى. ونىڭ ايتۋىنشا، دۇنيەجۇزىلىك كوشپەندىلەر ويىندارى قازاقستاننىڭ كوشپەلىلەر وركەنيەتىنە جانە ەلىمىزدە وزگە ەلگە ماقتانىشپەن كورسەتەتىن ۇلتتىق سپورت تۇرلەرى بار.

«جاقىندا حالىقتىڭ كوشپەندىلەر ويىنىنا قاتىستى پىكىرىن ءبىلۋ ماقساتىندا ساۋالناما ۇيىمداستىردىق. ناتيجەسى كوڭىل قۋانتارلىق. بارلىعى دەرلىك بۇل ءىس-شاراعا قاتىسۋدى جوسپارلاپ وتىر»، - دەدى باقىتجان تۇرلىبەكوۆ.

باقىتجان تۇرلىبەكوۆ ۇلتتىق سپورت تۇرلەرىمەن اينالىساتىن سپورتشىلار ءۇشىن كوشپەندىلەر ويىندارىنا قاتىسۋ ۇلكەن مارتەبە ەكەنىن اتاپ ءوتتى. مەملەكەت باسشىسى قاسىم-جومارت توقايەۆتىڭ باستاماسىمەن قولعا الىنعان بۇل ءىس-شارا قازاقستانداعى ۇلتتىق سپورت تۇرلەرىن دامىتۋعا سەپتىگىن تيگىزبەك.

«كوشپەندىلەر ويىندارى وتەتىن ۋاقىت جاقىنداعان سايىن كوز قۋانتارلىقتاي جاڭارتىلعان يپپودرومدار مەن سپورت كەشەندەرىن كورىپ وتىرمىز. ەندى ەلوردامىزدا ۇلتتىق سپورتتىڭ كەز كەلگەن تۇرىنەن حالىقارالىق دەڭگەيدە جارىستار وتكىزۋگە بولادى»، - دەدى ۇلتتىق سپورت تۇرلەرى قاۋىمداستىعىنىڭ ۆيتسە-پرەزيدەنتى.

كوشپەندىلەر ويىندارىنىڭ ارقاسىندا اتا-انالار بالالارىن ۇلتتىق سپورت تۇرلەرىنەن سەكسيالارعا جيى اپارادى. تۇرلىبەكوۆتىڭ ايتۋىنشا، بۇل - جارىستاردىڭ باستى جەتىستىگى.

ونىڭ ايتۋىنشا، ۇلتتىق سپورتتى دامىتۋ باعىتىندا بىرنەشە باعىتتا جۇمىستار جۇرگىزىلۋدە. تۇرلىبەكوۆ قازاقستاندا 100 دەن استام جوعارى وقۋ ورنى بار ەكەنىن، قاۋىمداستىق جاستاردى ۇلتتىق سپورتقا بەلسەندى تارتۋدى كوزدەپ وتىرعانىن ايتتى.

«ۇلتتىق سپورت تۇرلەرىن ستۋدەنتتەر اراسىندا كەڭىنەن ناسيحاتتاۋ ءۇشىن ستۋدەنتتىك ليگا قۇرۋ جوسپارلانىپ وتىر. جوبا اياسىندا بۇعان دەيىن عىلىم جانە جوعارى ءبىلىم مينيسترىمەن كەزدەسۋ ءوتىپ، وندا ماسەلەلەردىڭ ءمان-جايى ەگجەي-تەگجەي تالقىلاندى»، - دەدى ول.

ايتا كەتەيىك، 8-13-قىركۇيەك ارالىعىندا استانادا 89 ەلدەن قاتىسۋشىلار كەلەتىن دۇنيەجۇزىلىك كوشپەندىلەر ويىندارى وتەدى. دۇنيەجۇزىلىك كوشپەندىلەر ويىندارى - ەتنيكالىق سپورت تۇرلەرىنەن وتەتىن حالىقارالىق جارىس. ويىنداردىڭ نەگىزگى ميسسياسى - ەتنومادەني قوزعالىستى دامىتۋ، كوشپەلى حالىقتاردىڭ ويىندارىن ناسيحاتتاۋ جانە ساقتاۋ.