قازاقستاندا ونلاين ساۋدا ەكى ەسە ءوستى - مينيستر

استانا. KAZINFORM - سوڭعى ءۇش جىلدا ەلىمىزدە ونلاين ساۋدا ەكى ەسە ءوسىپ، 2 ميلليارد ا ق ش دوللارىنان استى. بۇل تۋرالى ساۋدا جانە ينتەگراتسيا ءمينيسترى ارمان شاققاليەۆ ءمالىم ەتتى.

- ەلەكتروندى كوممەرتسيا - وتاندىق جانە حالىقارالىق ماركەتپلەيستەر، شاعىن جانە ورتا بيزنەس ءۇشىن جاڭا مۇمكىندىكتەر اشادى. سونىمەن قاتار ەلىمىزدىڭ ەكسپورتتىق الەۋەتىن كەڭەيتىپ، جاھاندىق نارىقتاعى باسەكەگە قابىلەتتى ارتتىرادى. ءبىزدىڭ مينيسترلىك ەكسپورتتى قولداۋ ساياساتىن جۇيەلى جۇرگىزىپ كەلەدى، ءبىز وتاندىق كومپانيالارعا اناليتيكالىق جانە ستراتەگيالىق قولداۋدان باستاپ، قۇقىقتىق جانە ماركەتينگتىك كونسۋلتاتسيا بەرەمىز، - دەدى ارمان شاققاليەۆ ەلوردادا ءوتىپ جاتقان EXPO Goods Central Asia العاشقى حالىقارالىق فورۋم-كورمەسىندە.

ءمينيستردىڭ سوزىنە سەنسەك، ۆەدومستۆو قازاقستاندىق ەكسپورتتاۋشىلارعا شەتەلدەن سەرىكتەس تابۋعا، حالىقارالىق كورمەلەر مەن ساۋدا-ەكونوميكالىق ميسسيالارعا قاتىسۋعا جان-جاقتى جاردەمدەسەدى.

- EXPO Goods Central Asia العاشقى حالىقارالىق فورۋم-كورمەسى جاي عانا ونىمدەردى تانىستىرۋ ەمەس، بۇل ناقتى شەشىمدەر قابىلداۋ، ىسكەرلىك بايلانىس ورناتىپ، كەلىسىم جاساۋعا ارنالعان تاجىريبەلىك پلاتفورما، - دەپ تولىقتىردى ۆەدومستۆو باسشىسى.

بۇعان دەيىن حابارلاعانىمىزداي قازاقستان مەن ورتالىق ازيا اراسىنداعى تاۋار اينالىمى 7,6 ميلليارد دوللارعا جەتتى.

ايتا كەتەيىك، ەلوردادا EXPO Goods Central Asia اتتى 159 وتاندىق جانە حالىقارالىق ساۋدا ماركاسىنىڭ قاتىسۋىمەن كورمە جانە فورۋم ءوتىپ جاتىر.

اۆتور

داۋلەت ىزتىلەۋ