قازاقستاندا ونلاين-كرەديتكە تىيىم سالۋعا پەتيتسيا جاريالاندى

استانا. KAZINFORM - «حاق-نازار» قوعامدىق قورىنىڭ قىزمەتكەرلەرى ەلىمىزدە ونلاين كرەديت بەرۋگە تىيىم سالۋدى سۇرايدى. پەتيتسيا epetition.kz سايتىندا جاريالاندى.

پەتيتسيا اۆتورلارىنىڭ پىكىرىنشە، قازاقستاندىقتار قارجىلىق قىزمەتتەردى سيفرلاندىرۋدىڭ مۇنداي تۇرىنە ءالى دايىن ەمەس.

«ونلاين نەسيەلەردىڭ وڭاي قول جەتىمدىلىگى حالىقتىڭ وسال توپتارى اراسىندا قارىز جۇكتەمەسىنىڭ وسۋىنە جانە قارجىلىق تۇراقسىزدىققا اكەلەدى. جوعارى پايىزدىق مولشەرلەمەلەر مەن اشىق ايقىن ەمەس نەسيە شارتتارى كوبىنەسە ادامداردى قارىزعا باتىرادى. قارىز شۇڭقىرىنا تۇسۋدەن بولەك، ونلاين-نەسيە الاياقتىق، ۇرلىق جانە بوپسالاۋ سياقتى قارىزدى وتەۋ جولدارىمەن بايلانىستى قىلمىستاردىڭ كوبەيۋىنە الىپ كەلەدى»، - دەلىنگەن حابارلامادا.

سونداي-اق، پەتيتسيا تۇسىندىرمەسىندە اسكەري قىزمەت جاعدايىندا ونلاين كرەديت ماجبۇرلەۋ جانە قارجىلىق زورلىق-زومبىلىق كورسەتۋ قۇرالىنا اينالاتىنى ايتىلعان.

اۆتورلار ونلاين-كرەديتتەر بەرۋگە تىيىم سالۋدى عانا ەمەس، سونىمەن قاتار ميكروكرەديتتەر بەرۋ سالاسىنداعى زاڭنامانىڭ ساقتالۋىن باقىلاۋدى كۇشەيتۋدى تالاپ ەتەدى.

كەشە جاريالانعان پەتيتسيا 6-قىركۇيەككە دەيىن كوپشىلىكتىڭ تالقىسىنا ۇسىنىلىپ وتىر. قازىر پەتيتسيا 581 قارالىم جينادى، ازىرگە ەشكىم پىكىر قالدىرماعان.

اۆتور

داۋلەت ىزتىلەۋ