قازاقستاندا ۋتيل الىمى جويىلمايتىن بولدى

استانا. KAZINFORM - ق ر ونەركاسىپ جانە قۇرىلىس ءمينيسترى قانات شارلاپايەۆ ۋتيل الىمىنا قاتىستى پەتيتسيانى قاراستىرۋدىڭ قورىتىندىسىن شىعاردى.

2024 -جىلعى 27-مامىردا مينيسترلىككە «ق ر حالقى ۋتيل الىمى جانە باستاپقى تىركەۋگە قارسى» اتتى پەتيتسيا تۇسكەن بولاتىن.

«ق ر اكىمشىلىك راسىمدىك-پروتسەستىك كودەكسىنىڭ 90-5-بابىنا سايكەس، مينيسترلىك تاراپىنان 2024 -جىلعى 4-ماۋسىمدا پەتيتسيادا كورسەتىلگەن ماسەلەلەردى قاراۋ ءۇشىن جۇمىس توبى قۇرىلىپ، وعان زاڭناماعا سايكەس مۇددەلى مەملەكەتتىك ورگانداردىڭ وكىلدەرى، پارلامەنت دەپۋتاتتارى، ءوتىنىش بەرۋشى جانە ونىڭ وكىلدەرى، سونداي-اق قوعامدىق بىرلەستىكتەر كىردى.

جۇمىس توبىنىڭ وتىرىستارىن وتكىزۋ بويىنشا ءىس-شارالار جوسپارى ازىرلەندى، وندا كوكشەتاۋ، الماتى، سەمەي، قوستاناي قالالارىنداعى ماشينا جاساۋ كاسىپورىندارىنا بارۋ بولدى، وعان «كاماز- ينجينيرينگ»، «Kazrost Engineering Ltd.»، «قازاقستان اگرويننوۆاتسيالىق كورپوراتسياسى»، «Hyundai Trans Almaty» ،«Hyundai Trans Kazakhstan»، «سەماز»، «Daewoo Bus Kazakhstan» زاۋىتتارى كىردى.

پەتيتسيانى قاراۋ بارىسىندا ونىڭ اۆتورى مەن باستاماشىل توبى قايتا وڭدەۋ تولەمىن ەنگىزۋ باسەكەلەستىكتىڭ بۇزىلۋىنا اكەلىپ سوقتىرعانىن جانە سونىڭ سالدارىنان اۆتوكولىكتەردىڭ، اۋىلشارۋاشىلىق تەحنيكالارى مەن ارنايى تەحنيكالاردىڭ باعاسىنىڭ كۇرت وسۋىنە سونداي-اق اۆتوكولىك پاركىنىڭ ەسكىرۋىنە اكەلدى دەگەن ۋاجدەرىن ايتتى. سونداي-اق پەتيتسيادا «جاسىل دامۋ» ا ق ۋتيليزاتسيالاۋ جونىندەگى مىندەتتەمەلەرىن ورىنداماي، ەكولوگيالىق كودەكس تالاپتارىن بۇزىپ وتىرعانى ايتىلعان.

ۋاكىلەتتى مەملەكەتتىك ورگاندار مەن ۇيىمدار ءوتىنىشتىڭ دالەلدەرىمەن جانە وعان كەلىپ تۇسكەن ەسكەرتۋلەرمەن كەلىسپەيتىنىن بىلدىردى.

ق ر ءو ق م پەتيتسيانى قاناعاتتاندىرۋدان باس تارتۋ تۋرالى شەشىم قابىلدادى» دەلىنگەن ۆەدومستۆو حابارلاماسىندا.

ق ر ا ر پ ك-نىڭ 91-بابىنا سايكەس، اتالعان جاۋاپپەن كەلىسپەگەن جاعدايدا، پەتيتسيا بەرۋشى اكىمشىلىك اكتىنى قابىلداۋعا بايلانىستى ارەكەتكە (ارەكەتسىزدىككە) شاعىم جاساۋعا قۇقىلى.