قازاقستاندا تۋريستەر اراسىندا تانىمال گلەمپينگ ورتالىقتار

استانا. KAZINFORM - گلەمپينگ - جاي عانا دەمالىس ەمەس، تابيعات پەن جايلىلىقتى ۇيلەستىرەتىن ەرەكشە ءومىر سالتى. مۇندا تۋريستەر تابيعات اياسىندا دەمالىپ، ءقوناقۇي دەڭگەيىندەگى قىزمەتكە قول جەتكىزە الادى.

بۇگىندە گلەمپينگتەر الەم بويىنشا دا، ەلىمىزدە دە كەڭىنەن تانىمال بولا باستادى. تۋريزم جانە سپورت مينيسترلىگى تۋريستەر اراسىنداعى ەڭ ۇزدىك گلەمپينگ ورتالىقتاردى ۇسىندى.

L•E•S Hotel - Resort (بۋراباي)

بۇل گلەمپينگ بۋرابايدىڭ قىلقان جاپىراقتى ورمانىنىڭ ءدال ورتاسىندا ورنالاسقان. A-frame ۇلگىسىندەگى ۇيلەر پانورامالىق تەرەزەلەرمەن جابدىقتالعان، ينتەرەرى سكانديناۆ ستيلىندە بەزەندىرىلگەن. مۇندا ءبارى سانالى ءارى باياۋ دەمالىس ءۇشىن ويلاستىرىلعان - اۆتورلىق اس مازىرىنەن باستاپ جايلى مونشاعا دەيىن. تابيعات تىنىشتىعى مەن رومانتيكانى ۇناتاتىندار ءۇشىن تاپتىرماس تاڭداۋ.

OMIR Glamping (اقتاۋ)

كاسپيي تەڭىزىنىڭ جاعالاۋىندا ورنالاسقان بۇل ەرەكشە گلەمپينگ ەتنيكالىق ناقىش پەن زاماناۋي مينيماليزمدى تاماشا ۇشتاستىرعان. ۇيلەر قازاق مادەنيەتىنە ءتان ەلەمەنتتەرمەن بەزەندىرىلگەن، ال پانورامالىق تەرەزەلەر ءار تاڭدى ۇمىتىلماستاي قارسى الۋعا مۇمكىندىك بەرەدى. جايلىلىقتى، ماعىنالى ساتتەردى جانە تابيعاتپەن ۇندەستىكتە بولۋدى باعالايتىندار ءۇشىن ءمىنسىز ورىن.

Tenir Eco Hotel (شىمبۇلاق، الماتى)

تەڭىز دەڭگەيىنەن 3200 مەتر بيىكتىكتە ورنالاسقان گلەمپينگكە تەك اسپالى جول ارقىلى جەتۋگە بولادى. مۇندا پانورامالىق تەرەزەلەر تاۋدىڭ كەرەمەت كورىنىسىن تاماشالاۋعا مۇمكىندىك بەرەدى. Ski-in/ski-out فورماتى قىسقى سپورت تۇرلەرىن ۇناتاتىندار ءۇشىن ناعىز جۇماق مەكەن.

Aspen Eco Hotel (بۋراباي)

كۇمبەز پىشىنىندەگى ۇيلەر بۋرابايدىڭ قىلقان جاپىراقتى ورمانى ىشىندە ورنالاسقان. جىلى ەدەن، زاماناۋي جاعداي جانە پانورامالىق كورىنىستەر تىنىش ءارى جايلى دەمالىستى قامتاماسىز ەتەدى. مۇندا تازا اۋادا تىنىعىپ، ورمان ىشىندە سەرۋەندەپ، كۇش جيناۋعا بولادى. قالانىڭ كۇيبەڭ تىرشىلىگىن ءبىر ءسات ۇمىتىپ، وڭاشا دەمالىستى قالايتىندارعا ارنالعان تاماشا مەكەن.

Charyn Canyon Camp (شارىن شاتقالى)

ەلىمىزدىڭ ەڭ كورنەكتى تابيعي نىساندارىنىڭ ءبىرىنىڭ جانىندا ورنالاسقان بۇل گلەمپينگ - شىتىرمان وقيعالى دەمالىستى سۇيەتىندەرگە ارنالعان. كەشكى الاۋ جانىنداعى وتىرىستار، جۇلدىزدى اسپان استىنداعى تىنىشتىق پەن شاتقال بويىنداعى سەرۋەندەر دەمالۋشىلارعا ۇمىتىلماس اسەر سىيلايدى.

ايتا كەتەيىك، قازاقستاندا تۋريزم ماماندىعىن وقىتۋ فورماتى وزگەردى.

اۆتور

ەلميرا ورالبايەۆا