قازاقستاندا تەحنيكالىق بايقاۋ جۇرگىزۋگە رۇقسات بەرەتىن ۋاكىلەتتى ورگان انىقتالدى
استانا. KAZINFORM - ەلىمىزدە تەحنيكالىق بايقاۋ وپەراتورلارىنىڭ قىزمەتىنە ەكىنشى ساناتتاعى رۇقساتتار بەرۋگە ۋاكىلەتتى ورگان ايقىندالدى. بۇل تۋرالى قاۋلى جوباسى «اشىق ن ق ا» پورتالىندا جاريالاندى.
«قازاقستان رەسپۋبليكاسىنىڭ كولىك مينيسترلىگى تەحنيكالىق بايقاۋ وپەراتورلارىنىڭ قىزمەتىنە ەكىنشى ساناتتاعى رۇقساتتار بەرۋگە ۋاكىلەتتى ورگان بولىپ بەلگىلەنسىن»، - دەلىنگەن قۇجاتتا.
جوبا 2024 -جىلعى 3-قازاندا قابىلدانعان كولىك قۇرالدارىنىڭ جەكەلەگەن تۇرلەرىنىڭ قوزعالىسىن ۇيىمداستىرۋ جانە جول قاۋىپسىزدىگىن سيفرلاندىرۋ ماسەلەلەرى بويىنشا «جول قوزعالىسى تۋرالى» زاڭ شەڭبەرىندە ازىرلەندى.
قاۋلى 2025 -جىلعى 5-ساۋىردەن باستاپ قولدانىسقا ەنگىزىلەدى، ال 18-قاراشاعا دەيىن جۇرتشىلىق تالقىسىنا ۇسىنىلىپ وتىر.
ايتا كەتەيىك، قىركۇيەكتە اۆتوكولىكتى تەحنيكالىق بايقاۋدان وتكىزۋ ساپاسىن ءتيىمدى باقىلاۋدىڭ جاڭا تەتىكتەرى ازىرلەنەتىنى تۋرالى حابارلاعان ەدىك.
سونداي-اق، ءبىزدىڭ اگەنتتىك ەل وڭىرلەرىندە اۆتوكولىكتى تەحنيكالىق بايقاۋدان وتكىزۋ باعاسىنا شولۋ جاساعان ەدى.