قازاقستاندا تۋبەركۋلەزدى ەمدەۋ مەرزىمى قىسقاردى

استانا. KAZINFORM - بيىل 6 ايدا ەلىمىزدە 8633 ادام پروفيلاكتيكالىق ەم الدى، ونىڭ ىشىندە 55 پايىز - بالالار، 45 پايىز - ەرەسەكتەر. بۇل تۋرالى دەنساۋلىق ساقتاۋ مينيسترلىگىنىڭ ۇلتتىق فتيزيوپۋلمونولوگيا عىلىمي ورتالىعىنىڭ ديرەكتورى، دەنساۋلىق ساقتاۋ مينيسترلىگىنىڭ شتاتتان تىس باس فتيزياتر-دارىگەرى مالىك ادەنوۆ ءمالىم ەتتى.

- تۋبەركۋلەز ينفەكتسياسىن پروفيلاكتيكالىق ەمدەۋدىڭ جاڭا ءتيىمدى رەجيمى ەنگىزىلدى، ياعني «ريفاپەنتين» پرەپاراتىن قولدانا وتىرىپ 6 ايدان 1-3 ايعا دەيىن قىسقارادى. بيىل 6 ايدا 8633 ادام پروفيلاكتيكالىق ەم الدى، ونىڭ ىشىندە 55 پايىز بالالار، 45 پايىز ەرەسەكتەر. وسىلايشا، (د د ۇ ستاندارتىنا كەمىندە 90 پايىز قول جەتكىزىلدى) پروفيلاكتيكالىق ەم 93 پايىز تيىمدىلىگىن كورسەتتى. تۋبەركۋلەز ينفەكتسياسىن پروفيلاكتيكالىق ەمدەۋ، اسىرەسە تۋبەركۋلەزگە شالدىعۋ قاۋپى جوعارى توپتار اراسىندا اۋرۋدىڭ بەلسەندى ءتۇرىنىڭ تارالۋىن جانە دامۋىن بولدىرماۋ جولىندا شەشۋشى ءرول اتقارادى، - دەدى مالىك ادەنوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ايتا كەتەيىك، قازاقستاندا تۋبەركۋلەزدى ەمدەۋ، دياگنوستيكالاۋ تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە تەگىن جۇرگىزىلەدى.

- ودان بولەك تۋبەركۋلەز دەرتىنەن ينەكتسيالىق پرەپاراتتاردى قولدانباي ءتيىمدى ەمدەۋ رەجيمى بار. سول سياقتى اتالعان دەرتتى كوپ ءدارى- دارمەكپەن ەمدەۋ مەرزىمى 24 ايدان 9-12 ايعا دەيىن قىسقارتىلدى. پرەتومانيد (BPaL/BPalM) پرەپاراتىن قولدانا وتىرىپ، دۇنيەجۇزىلىك دەنساۋلىق ساقتاۋ ۇيىمى ۇسىنعان دارىگە ءتوزىمدى تۋبەركۋلەزدى ەمدەۋدىڭ جاڭا رەجيمىن ەنگىزۋ بويىنشا پيلوتتىق جوبا ىسكە اسىپ جاتىر، ول بويىنشا ەمدەۋ مەرزىمى 6 ايعا دەيىن قىسقارتىلادى، - دەيدى ۆەدومستۆو وكىلى.

بۇعان دەيىن حابارلاعانىمىزداي، بيىل التى ايدا ەلىمىزدە تۋبەركۋلەز دەرتىنەن ءولىم-ءجىتىم 20 پايىز تومەندەدى.

ال بيىل ناۋرىزداعى ەسەپ بويىنشا ەلىمىزدە تۋبەركۋلەزدەن ءولىم-ءجىتىم 50 پايىز ازايعان.

سونداي-اق ەلىمىزدە 158 مىڭعا جۋىق نارەستەگە تۋبەركۋلەزگە قارسى ۆاكسينا ەگىلدى.

ايتا كەتەيىك، ا ق ش عالىمدارى تۋبەركۋلەزگە قارسى كۇرەستە ۇلكەن جەتىستىككە جەتتى.