قازاقستاندا سپورت فەدەراتسيالارىنىڭ قىزمەتىندە وزگەرىس بولادى

استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق نورمالاردىڭ ارتىق زاڭنامالىق رەگلامەنتتەلۋىن بولدىرماۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

قۇجاتتا ەلىمىزدىڭ سپورت سالاسىندا جاڭا ىرىكتەۋ جۇيەسىن ەنگىزۋ قاراستىرىلعان. زاڭ جوباسىنا سايكەس، باسىم سپورت تۇرلەرى ولاردىڭ الەمدىك رەيتينگتەرى نەگىزىندە ەمەس، وليمپيادا، پاراليمپيادا، سۋردليمپيادا، ازيا ويىندارىندا ۇلتتىق قۇراما كوماندالارىنىڭ كورسەتكەن ناتيجەلەرى بويىنشا ىرىكتەلەتىن بولادى.

«قازىر رەسپۋبليكا بويىنشا 180 نەن استام سپورت ءتۇرى دامىتىلىپ وتىر. سپورت تۇرلەرىنىڭ بارلىعى بويىنشا سپورت رەزەرۆىن دايارلاۋ جۇزەگە اسىرىلادى. ءبىراق، جىل سايىن 13 جازعى جانە 5 قىسقى وليمپيادالىق سپورت تۇرىنەن مەدال جەڭىپ الىنادى. وسىنىڭ ءبارى سپورتشىلاردى دايارلاۋ جۇيەسىندەگى جاتتىعۋدىڭ باستاپقى كەزەڭىنەن جوعارى جەتىستىكتەر سپورتىنا دەيىنگى ساتسىزدىكتەردىڭ ناتيجەسى سانالادى. وسىلايشا، ءبىز جىل سايىن ۋاكىلەتتى ورگان رەتىندە بالالار-جاسوسپىرىمدەر سپورت مەكتەپتەرى مەن مەكتەپ- ينتەرناتتار شىعىندارىنىڭ وسكەنىن بايقايمىز. شىعىنداردىڭ ەلەۋلى بولىگى وليمپيادالىق ەمەس سپورت تۇرلەرىنىڭ دايىندىعىنا جۇمسالادى»، - دەدى ق ر تۋريزم جانە سپورت ءمينيسترى ەربول مىرزابوسىنوۆ.

ونىڭ ايتۋىنشا، زاڭ جوباسىن ازىرلەۋ بارىسىندا جاقىن ماڭداعى (وزبەكستان، بەلارۋس) جانە الىس شەت ەلدەردىڭ ( ۇلى بريتانيا، گەرمانيا، نورۆەگيا) حالىقارالىق تاجىريبەسى زەرتتەلدى.

قۇجات اياسىندا سپورت فەدەراتسيالارىنىڭ قىزمەتى دە وزگەرەدى. قازىرگى كەزدە جەرگىلىكتى، وڭىرلىك جانە رەسپۋبليكالىق فەدەراتسيالار جەكە سۋبەكتىلەر رەتىندە سانالادى. ولار ءبىر- بىرىنە باعىنبايدى. تيىسىنشە سپورتتى دامىتۋ بويىنشا تاۋەلسىز ساياسات جۇرگىزەدى. وسىنىڭ ءبارى مۇددەلەر قاقتىعىسىنا، جاۋاپكەرشىلىكتىڭ بۇلىڭعىرلىعىنا جانە سپورتتى دامىتۋدىڭ «باياۋلاۋىنا» اكەلەدى.

«ۇسىنىلىپ وتىرعان مودەل جەرگىلىكتى فەدەراتسيالاردىڭ اككرەديتتەلگەن رەسپۋبليكالىق (وڭىرلىك) سپورت فەدەراتسيالارىنا باعىنىشتىلىعىن كوزدەيدى. وسىعان بايلانىستى زاڭ جوباسى اياسىندا جوعارى جەتىستىكتەر تۇرىنە جاتاتىن سپورت تۇرلەرىن ناقتى شەكتەۋ ۇسىنىلادى. بۇل دەگەنىمىز - وليمپيادا، پاراليمپيادا، سۋردليمپيادا، ازيا جانە پارا ازيا ويىندارى باعدارلاماسىنا ەنگىزىلگەن سپورت تۇرلەرى، سونداي-اق ۇلتتىق سپورت تۇرلەرى. ولاردىڭ ىشىندە مەدالدىق ناتيجەسى بار سپورت تۇرلەرى باسىم سپورت تۇرلەرىنە قوسىلادى. تيىسىنشە، رەسپۋبليكالىق ءارى جەرگىلىكتى دەڭگەيدە ءبىرىنشى كەزەكتە قارجىلاندىرىلادى. سپورت رەزەرۆى تەك جوعارى جەتىستىكتەر سپورتىنىڭ تۇرلەرى بويىنشا دايارلانادى. ولاردى دايارلاۋ ۋاكىلەتتى ورگان بەكىتەتىن سپورتتىق دايارلىقتىڭ ۇلتتىق ستاندارتتارىنا سايكەس قاتاڭ جۇرگىزىلەدى»، - دەدى مينيستر.

ونىڭ پايىمىنشا، وسى وزگەرىستەردىڭ بارلىعى قازىرگى سپورت جۇيەسىن جاڭعىرتۋعا، ونىڭ ناقتى ناتيجەگە - «مەدال جەڭىپ الۋعا» باعدارلانۋىنا الىپ كەلەدى.

«بيۋدجەت قاراجاتىن جۇمساۋدىڭ تيىمدىلىگى جانە بارلىق سپورت سۋبەكتىلەرىنىڭ جاۋاپكەرشىلىگى ارتادى»، - دەدى ۆەدومستۆو باسشىسى.

اتاپ ايتقاندا، زاڭ جوباسىندا تاعى دا ءبىر ماڭىزدى وزگەرىس بار، ياعني قازاقستان ازاماتى سانالمايتىن سپورتشىلاردى مەملەكەتتىك بيۋدجەت جانە كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا تىيىم سالىنادى. بۇل شارا ەل ازاماتتارىنىڭ سپورتتا دا، قارجىلىق قولداۋدادا باسىمدىققا يە بولۋىن قامتاماسىز ەتەدى.