قازاقستاندا ساۋساق ءىزىن تىركەۋدىڭ جاڭا ەرەجەلەرى ازىرلەندى

استانا. KAZINFORM - ەلىمىزدە داكتيلوسكوپيالىق جانە گەنومدىق تىركەۋدى جۇرگىزۋدىڭ جاڭا ەرەجەلەرى حالىق نازارىنا ۇسىنىلدى.

اشىق ن ق ا پورتالىندا جاريالانعان قۇجات جوباسىندا قازاقستان رەسپۋبليكاسىنىڭ ازاماتتارىنان، داكتيلوسكوپيالىق تىركەۋدەن وتكەن شەتەلدىكتەر مەن ازاماتتىعى جوق ادامداردان داكتيلوسكوپيالىق اقپاراتتىڭ نە ءۇشىن جينالاتىنى ايتىلعان.

- ق ر ازاماتتارىنىڭ، شەتەلدىكتەردىڭ جانە ازاماتتىعى جوق ادامداردىڭ جەكە باسىن راستاۋ جانە (نەمەسە) انىقتاۋ؛

- ق ر اۋماعىندا شەتەلدىكتەر مەن ازاماتتىعى جوق ادامداردى ەسەپكە الۋ جانە باقىلاۋ؛

- جەكە ادامنىڭ، قوعامنىڭ جانە مەملەكەتتىڭ قاۋىپسىزدىگىن قامتاماسىز ەتۋ؛

- داكتيلوسكوپيالىق اقپارات بويىنشا جەكە باسىن راستاۋ ءراسىمى ارقىلى قازاقستان رەسپۋبليكاسىنىڭ مەملەكەتتىك شەكاراسىنان وتەتىن ادامداردى ەسەپكە الۋ جانە باقىلاۋ.

«داكتيلوسكوپيالىق تىركەۋدىڭ ماقساتى - داكتيلوسكوپيالىق اقپارات نەگىزىندە ادامنىڭ جەكە باسىن انىقتاۋ جانە راستاۋ. جەكە باسىن انىقتاۋ داكتيلوسكوپيالىق اقپاراتتىڭ دەرەكقورى بويىنشا سايكەستەندىرۋدى جۇرگىزۋ كەزىندە، جەكە باسىن راستاۋ - ناقتى ادامنىڭ داكتيلوسكوپيالىق اقپاراتى بويىنشا ۆەريفيكاتسيالاۋ جولىمەن جۇزەگە اسىرىلادى»، - دەلىنگەن قۇجات جوباسىندا.

داكتيلوسكوپيالىق تىركەۋدى ىشكى ىستەر ورگاندارى، سىرتقى ساياسي قىزمەت سالاسىنداعى ۋاكىلەتتى مەملەكەتتىك ورگان، شەتەلدەگى ديپلوماتيالىق جانە ولارعا تەڭەستىرىلگەن وكىلدىكتەر، سونداي-اق ق ر كونسۋلدىق مەكەمەلەرى، كولىك سالاسىنداعى ۋاكىلەتتى مەملەكەتتىك ورگان جانە ۇلتتىق قاۋىپسىزدىك ورگاندارى جۇرگىزەدى.

«داكتيلوسكوپيالىق اقپاراتتى جيناۋ داكتيلوسكوپيالاۋ جانە ءتيىستى اقپاراتتىق جۇيەگە دەربەس دەرەكتەردى ەنگىزۋ ارقىلى ادامنىڭ ەكى الاقانى نەمەسە ەكى قولىنىڭ ون ساۋساعىنىڭ پاپيلليارلىق ۇلگىلەرىنىڭ قۇرىلىمدىق ەرەكشەلىكتەرى تۋرالى بيومەتريالىق دەرەكتەردى الۋدى قامتيدى»، - دەلىنگەن ەرەجەدە.

قۇجات جوباسى 30-شىلدەگە دەيىن كوپشىلىكتىڭ تالقىسىنا ۇسىنىلىپ وتىر.